5.09c
Երեվան
հնգ, մրտ 05
Հայաստանի Հանրապետական կուսակցութիւնը խորապէս մտահոգուած է վերջին շրջանին մեր երկրի մէջ արձանագրուող բացասական զարգացումներու նոր դրսեւորումներով։ Այս մասին յայտարարութիւն տարածած է Հայաստանի Հանրապետական կուսակցութեան գործադիր մարմինը։
«Հայաստանեայց Առաքելական Սուրբ Եկեղեցու նկատմամբ չդադարող հակասահմանադրական յարձակումները, աշխարհաքաղաքական միջավայրի շարունակուող վատթարացումը եւ այդ իրավիճակում ՀՀ գործող կառավարիչների անհամարժէք վարքագիծը, առաջիկայ խորհրդարանական ընտրութիւնների նախաշեմին վարչական ռեսուրսի բացայայտ չարաշահումը, ինչպէս նաեւ ժողովրդավարական ինստիտուտների համակարգային քայքայումը ուղղակի վտանգ են ներկայացնում Հայաստանի Հանրապետութեան ինքնիշխանութեան, կայունութեան եւ սահմանադրական կարգի համար։
Մենք յստակ յայտարարում ենք․ եթէ առկայ միտումները շարունակուեն, ապա 2026 թուականի յունիսի խորհրդարանական ընտրութիւնները չեն կարող ճանաչուել ազատ, արդար եւ ժողովրդավարական։ Դրանք ռիսկ են պարունակում դառնալու հերթական ձեւականութիւն, որի միջոցով արտաքին խաղացողները կը փորձեն լեգիտիմացնել հակաժողովրդական եւ հակապետական վարքագիծ դրսեւորած ռեժիմին։
Կարեւորելով գալիք հերթական ընտրական գործընթացների վերահսկողութեան եւ քաղաքացիների բարձր մասնակցութեան ապահովման անհրաժեշտութիւնը՝ միաժամանակ վերահաստատում ենք, որ գործող իշխանութեան հեռացումը իրաւական ճանապարհով այսօր ազգային անհրաժեշտութիւն է՝ հայկական պետականութեան վերջնական փլուզումը կանխելու համար։
Ելնելով դրանից՝ Հայաստանի Հանրապետական կուսակցութիւնը կոչ է անում բոլոր ընդդիմադիր ուժերին, քաղաքացիական հասարակութեանը եւ իւրաքանչիւր քաղաքացու՝ վեր կանգնել կուսակցական եւ խմբային նեղ շահերից եւ միաւորուել իմպիչմենտի սահմանադրական գործիքակազմի շուրջ։
Հիմք ընդունելով խորհրդարանական ընդդիմութեան վարչապետի միասնական թեկնածու, Մասիս համայնքի նախկին ղեկավար Դաւիթ Համբարձումեանի մեզ ուղղուած դիմումը՝ մենք յայտարարում ենք քաղաքական երկխօսութիւն եւ կոնսուլտացիաներ մեկնարկելու մեր նախաձեռնութեան մասին։
Մենք բաց ենք բոլոր այն ուժերի համար, որոնք պատրաստ են համատեղ ջանքերով ձեւաւորել անցումային կառավարութիւն, ներառեալ համաձայնութիւն նոր միասնական վարչապետի թեկնածուի շուրջ, որը կը կարողանայ վերականգնել ժողովրդավարական արժէքները, ապահովել իսկապէս ազատ ընտրութիւններ եւ կասեցնել ներկայիս ոչ ինքնիշխան արտաքին քաղաքականութիւնը։
Հայաստանի ապագան չի կարող կախուած մնալ այն ռեժիմից, որը ոտնահարում է սեփական պատմութիւնն ու հաւատը, լքում է օտար գերութեան մէջ յայտնուած իր զաւակներին, հարուածում է երկրի անվտանգութեանը եւ վախենում է սեփական ժողովրդի կամարտայայտութիւնից։
Միասնութեան եւ վճռական գործողութիւնների ժամանակը հիմա է»։
