7.06c
Երեվան
ուրբ, մրտ 21
Եգիպտոսի նախագահ Զօր. Ապտըլ Ֆաթահ Ալ Սիսի ներողութիւն խնդրած է Ղըպտի համայնքի զաւակներէն: Այս մասին տեղեկութիւն փոխանցող աղբիւրները կը հաղորդեն, որ Եգիպտոսի նախագահը 6 Յունուարին այցելած է Աղէքսանդրիոյ Մարկոսեան Մայր տաճար, ուր Թէոտորոս Պապը կը մատուցէր Ծննդեան պատարագ: Նախագահը պատարագի աւարտին հակիրճ խօսք մը արտասանելով իր ներողմտութիւնը հայցած է Ղըպտի համայնքէն: Ան ըսած է «Եկած եմ անձմաբ ներողութիւն խնդրելու ձեզմէ կապուած այն տխուր դէպքերուն, որ տեղի ունեցան վերջին շրջանին եւ լիայոյս եմ, որ կ'ընդունիք իմ ներողութիւնս»: Սիսի ըսած է, որ Եգիպտոս, դարերէ ի վեր համայն մարդկութեան քաղաքակրթութիւն ջամբեց եւ այս ծանր պայմաններուն մէջ եւս պիտի շարունակէ իր առաքելութիւնը: Զօր. Սիսի նաեւ ըսած է, որ ամէնէն կարճ միջոցին պիտի վերանորոգուին բոլոր այն եկեղեցիները, որ հրկիզուեցան ծայրայեղականներուն կողմէ նշելով նաեւ, որ պետութիւնը թերացած է այդ գործին մէջ եւ վստահեցնելով, որ շուտով այդ աշխատանքները սկիզբ պիտի առնեն: Եգիպտոս նախագահը աւարտին շնորհակալութիւն յայտնած է Ղըպտիներու Պապէն եւ համայն Ղըպտիներէն երկրին մէջ պատահած դէպքերու ընթացքին անոնց ցուցաբերած հայրենասէր եւ անաչառ կեցուածքներուն համար:
