«Ուրֆա 1915: Քաղաք մը, երկու բժիշկներ եւ բազմաթիւ Հայեր» վերնագրով ընթերցման երեկոյթ Գերմանիոյ մէջ

«Ուրֆա 1915: Քաղաք մը, երկու բժիշկներ եւ բազմաթիւ Հայեր» վերնագրով ընթերցման երեկոյթ Գերմանիոյ մէջ

Կիրակի, 13 նոյեմբերի երեկոյեան Գերմանիոյ Առաջնորդարանի Մշակութային յանձնախումբի եւ «Volkshochschule»ի համագործակցութեամբ տեղի ունեցաւ «Ուրֆա 1915: Քաղաք մը, երկու բժիշկներ եւ բազմաթիւ Հայեր» վերնագրով ընթերցման երեկոյթ մը, հեղինակներ Տողան Աքհանլըի եւ Մոնա Եահիայի մասնակցութեամբ: Երեկոյթի երաժշտական բաժինը ստանձնած էր դաշնակահարուհի Նարէ Կարոյեան: Երեկոյթի բացումը կատարեց Քէօլնի Հայ համայնքի Կոմիտաս երգչախումբը, ներկայացնելով հայ աշխարհիկ երգեր, Արտակ Ոսկանեանի ղեկավարութեամբ: Բացման խօսքը արտասանեց Թեմական խորհուրդի ատենապետ եւ Մշակութային յանձնախումբի պատասխանատու Սերովբէ Օտապաշեան: Ապա, ներկաներուն իր ողջոյնի խօսքը ուղղեց Առաջնորդ Գարեգին Սրբազան, ընդգծելով նման ձեռնարկներու կարեւորութիւնը: Ան շեշտեց համայնքի եւ Քէօլնի քաղաքապետութեան միջեւ տիրող սերտ յարաբերութիւնները, յոյս յայտնենով, որ քաղաքապետարանը մօտ ժամանակէն կ՚ընդառաջէ համայնքի դիմումին եւ կ՚արտօնէ Հայկական խաչքարի մը զետեղումը: