Գամիշլիի հայկական թաղամասերը հրթիռարձակման ենթարկուած են: Այս մասին «Արեւելք» տեղեկութիւն ստացաւ Գամիշլիի իր աղբիւրէն, որ նաեւ նշեց, թէ հրթիռները նետուած են թրքական հողերէ: Մեր աղբիւրը նաեւ նշեց, որ հրթիռարձակումներուն հետեւանքով ծանր վնասներ կրած են հայաբնակ թաղամասերը: Մարդկային զոհերու մասին տեղեկութիւններ չեն փոխանցուիր: Մեր աղբիւրը նաեւ յայտնեց, որ երէկ ահաբեկչական մեծ պայթում մը որոտացած է Գամիշլիի մէջ, որուն հետեւանքով եւ նախնական տուեալներով զոհուած են 5 քիւրտ բնակիչներ: Մինչեւ այս պահը, որեւէ կողմ չէ ստանձնած պայթումին պատասխանատուութիւնը եւ քաղաքին մէջ իրադրութիւնը կը մնայ զգուշաւոր: Նշենք, որ տասը օր առաջ ծանր բախումներ գրանցուած էին մէկ կողմէ տեղի արաբ, եւ միւս կողմէ՝ քիւրտ զինեալներուն կողմէ: Երկու կողմերը ունեցած էին մարդկային ծանր կորուստներ: Սուրիոյ կառավարութեան ճիգերուն շնորհիւ աւելի ուշ հաստատուած էր հրադադար, սակայն մինչեւ այս պահը շրջանին մէջ լարուած իրավիճակ կը տիրէ: Մեր աղբիւրը կը հաւաստէ, որ հայկական կողմը կը շարունակէ ապահովել շրջանի հայ բնակչութեան անվտանգութիւնը: