12.09c
Երեվան
ուրբ, ապր 19
Ռուսիա-(«Ալ Հայաթ»- Լոնտոն) Ռուսիա յաւելեալ ուժեր ուղղարկած է Սուրիա: Այս մասին «Կոմսոմոլսքայա Բրավտա» պարբերականին ըսած է ռուսական բանակի Զօր. Վիքթոր Պոնտարիֆ: Պոնտարիֆ նաեւ ըսած է, որ նոր առաքուած ուժերուն մէջ կան պաշտպանական հրթիռային համակարգեր Սուրիա գտնուող զօրքերուն եւ խարիսխներուն պաշտպանութեան համար: Նոյն բանբերը նաեւ հաւաստած է, որ Ռուսիա կը գիտակցի, որ իր օդանաւերը կրնան գրոհներու ենթարկուիլ եւ առ այդ յատուկ կանխարգելիչ քայլերու կը ձեռնարկէ: Ըստ «Ալ Հայաթ»ին, երէկ միջին արեւելեան ջուրեր հասած ռուսական նաւատորմին մէջ կան օդային համակարգերու պաշտպանութեան յատուկ «ռատարներ»: Նշենք, որ մէկ շաբթուան ընթացքին երկու տարբեր վայրերու մէջ ռուսական երկու օդանաւեր ջախջախուած էին: Հակառակ անոր, որ արկածներուն շուրջ ընթացող հետախուզման աշխատանքները չեն աւարտած, սակայն օդանաւերուն դէմ եղած ահաբեկչական յարձակումներու վարկածը շատ մեծ է: Յիշեցնենք, որ հարաւային Սուտանի վերեւ ջախջախուած բեռնատար օդանաւի զոհերուն 5-ը հայեր են:
