Լոս Անճելըսի (UCLA) համալսարանի մասնաճիւղի տնօրէնութիւնը կը տեղեկացնէ, թէ համալսարանի երկարամեայ դասախօսներէն փրոֆ. Էն Գարակէօզեան, նշանակուած է Ուսումնասիրական հարցերու ժամանակաւոր փոխտնօրէն։ Փրոֆ. Էն Գարակէօզեան 1982-էն ի վեր անդամ է համալսարանի ճարտարագիտութեան բաժանմունքի անձնակազմին, ինչպէս նաեւ համալսարանի ուժանիւթային ուսումնասիրութեանց տարրալուծարանի ղեկավարն է եւ համալսարանին ու Միացեալ Նահանգներու օդուժին միացեալ մէկ ծրագիրը հանդիսացող Օդանաւային գիտութեանց համագործակցական կեդրոնի վարիչը։ Համալսարանէն ներս շարք մը այլ պաշտօններ ստանձնած Գարակէօզեան նաեւ համալսարանէն դուրս ստանձնած է պաշտօններ, որոնց շարքին Հայաստանի Ամերիկեան համալսարանի հոգաբարձուի պաշտօնը։ Դոկտ. Էն Գարակէօզեան աւարտած է Գալիֆորնիոյ համալսարանի Լոս Անճելըսի մասնաճիւղի ճարտարագիտութեան բաժանմունքը ու մասնագիտացած է Գալիֆորնիոյ ճարտարագիտութեան հիմնարկին մէջ։
Նիւթի աղբիւրը ՝ «Ասպարէզ»: