Փարիզը ծանրօրէն հարուածած ահաբեկչութեան հետեւանքով անյայտ կորսուածներու շարքին է հայուհի մը ՝ Լոլա Ուզունեան: Ֆրանսայի մեր աղբիւրներէն քաղելով տեղեկութիւնը, յաւելենք, որ Լոլան ու անոր հայրը դէպքի օրը ներկայ եղած են «Պաթակլան» սրահին մէջ, ուր տեղի կ'ունենար համերգ մը: Կը հաղորդուի, որ անոր հայրը յաջողած է տուն վերադառնալ, սակայն Լոլայի ճակատագիրը մինչեւ այս պահը կը շարունակէ մնալ անյայտ: «Արեւելք» այս առումով կապ հաստատեց Փարիզի Ազգային Առաջնորդարանի դիւանապետ Տիար Գրիգոր Դաւիթեանին հետ, որ այս մասին խօսելով ըսաւ, թէ իրավիճակը կը շարունակէ մնալ բաւական խառն: Դաւիթեան նաեւ յայտնեց, որ տասնեակ քաղաքացիներ կը շարունակեն հիւանդանոցէ-հիւանդանոց այցելել փնտռելու համար իրենց հարազատները եւ քիչ չէ թիւը այն քաղաքացիներուն, որոնց ճակատագիրը կը մնայ անյայտ: