18.09c
Երեվան
ուրբ, սպտ 27
Ամերիկեան «The Foreign Policy» ամսագիրը հրապարակած է յօդուած մը, որ պատրաստուած էր երկար բացակայութենէ ետք, ծպտեալ ձեւով իր քաղաքը վերադարձած Մարուան Հիշամ կեղծանունով սուրիացիին կողմէ եւ յատկացուած է Տահէշի «մայրաքաղաք» համարուող Ռաքքային:
Յօդուածագիրը կը գրէ, թէ Ռաքքան լեցուն է երկար մօրուք ունեցող Տահէշի զինեալներով, որոնք մի քանի մակարդակներու կը բաժնունին: Անոնց մէկ մասը վերցուցած է Ռաքքայի բնակիչներուն Տահէշի «Շարիհաթ»ը սորվեցնելու գործին:
Մզկիթներուն մէջ ընթացող կրօնական դասընթացքները դարձած են կեանքի պարտադիր օրէնսգիրք եւ քաղաքացիները պարտադրուած են «Շարիհաթ»ը սորվիլ՝ փրկելու համար իրենց կեանքերը: Առաջին բանը, որով կը սկսի ռաքքացիներու օրը, իսլամական ուսմունքի դասերուն հետեւիլն է, որ կը մատուցուի սալաֆիստներու եւ տեղի կ'ունենայ մզկիթներէն ներս:
Ներկաները, որոնց մեծ մասը պատանիներ են, կը մաքառին իրենց ընտանիքներու հաց եւ ուտելիք ապահովելու համար, շատ գրաւիչ կը գտնեն «խալիֆայութեան կորիւններ»ու շարքերուն միանալը: Քիչ մը աւելի մեծերը, որոնք կը շարունակեն դասերուն հետեւիլ, իսլամական պետութենէն վճարագիր կը ստանան՝ չորս հարիւր տոլար արժողութեամբ: Յօդուածին մէջ կը նշուի նաեւ, որ կազմակերպութեան կողմէ դասերու մասնակցութիւնը պատժամիջոց դարձած է, Աստծոյ կամքին հակառակ գործողներուն համար, ինչպէս օրինակ ծխողներուն, կամ անոնց, որոնք իրենց խանութները չեն փակեր աղօթքի ժամերուն:
Յօդուածը կը նշէ, որ պատիժի սրութիւնը կարծես մեծաւ մասամբ կախեալ է զայն գործադրողին քմահաճոյքէն: Պատիժ կիրառողը շատ յաճախ կը զրկէ իր «ուսանողները» խոստացուած 400 ամերիկեան տոլարէն , որպէս հատուցում անոնց ծխելուն , կամ իրենց կիները տունէն գլխաբաց դուրս գալու արտօնութեան համար:
Ինչ կը վերաբերի քաղաքին մէջ բնակչութեան, յօդուածագիրը կը գրէ, թէ կազմակերպութեան անդամները տիրացած են բոլոր Ռաքքայէն գաղթողներու տուներուն, եւ վերաբնակեցուցած են զանոնք օտարազգի զինեալներով եւ անոնց ընտանիքներով: Կը նշուի նաեւ, թէ ինչպէս յայտնի է, ժամանակին արաբները Ռաքքայի մէջ կ'ապրէին քիւրտերու հետ կողք-կողքի, սակայն կազմակերպութիւնը ստիպած էր քիւրտերուն հեռանալ իրենց տուներէն եւ անցնիլ մօտակայ տարածքները, խոստանալով պահպանել իրենց սեփականութիւնը, սակայն այդ խոստումները չեն յարգուած:
Յօդուածին մէջ նաեւ կը գրուի այն մասին, թէ կազմակերպութիւնը նոր բնակիչներ հաւաքագրելու միտումով, փորձած է օգտագործել փախստականներու ճգնաժամը, եւ տեսաֆիլմեր արձանագրած է, ուր կոչ կ'ուղղէ սիւննի իսլամներուն վերադառնալ: Ֆիլմին մէջ իրար կողքի կը ցուցադրուին մէկ կողմէն Ռաքքայի բնութեան գեղեցկութիւնը , իսկ միւս կողմէն փախստականներու ճգնաժամի եւ ծովուն մէջ խեղդուողներու ողբերգութիւնը, ազդելու համար վերջիններուս վրայ:
«The Foreign Policy»ի յօդուածը նաեւ ցոյց կու տայ, որ կազմակերպութիւնը աշխատած է ամէն կերպ Ռաքքան մեկուսացնել աշխարհէն, արգիլած է համացանցը, բջիջային հեռախօսները եւ փակել տուած է սրճարանները:
Օդային յարձակումներ
Ռաքքայի կեանքի այլ դրեսւորումներէն մէկն ալ բնակչութեան կրած տառապանքն է, օդուժի կողմէ հասցուած հարուածումներու հետեւանքով, որ կ'իրականացուէր միջազգային դաշինքի պետութիւններու կործանիչներով: Մասնաւորապէս ֆրանսական օդանաւներու կողմէ տրուած հարուածներուն հետեւանքով Եփրատ գետի կամուրջի ոչնչացումը աւելիով ծանրացուցած էր քաղաքացիական բնակչութեան տառապանքները:Կը նշուի նաեւ, որ Ռաքքայի մէջ գտնուող ամէն ինչ օդանաւերու թիրախ դարձած է, քանի որ Իսլամական պետութեան տարրերը ամենուր կը գտնուին, սակայն ռումբերուն պայթումէն ետք, մարդիկ դարձեալ իրենց առօրեայ գործերուն կ'անցնին:
