image

Հայաստանի ՀՕՄ-ը ընտրած է Շրջանային Վարչութիւն

Հայաստանի ՀՕՄ-ը ընտրած է Շրջանային Վարչութիւն

Օրերս Երեւանի մէջ տեղի ունեցած ժողովի աւարտին ՀՕՄ-ի Հայաստանի մարմինը ընտրած է Շրջանային Վարչութեան նոր կազմ գլխաւորութեամբ նուիրեալ եւ կարող ՀՕՄ-ուհի Մարօ Քէշիշեանի։

Այս մասին «Արեւելք» իմացաւ համացանցէն։

 Ստորեւ կը ներկայացնենք այդ մասին հրապարակուած լրատւութիւնը։

 

ՀՕՄի Հայաստանի Միաւորը Ընտրեց Նոր Շրջանային Վարչութիւն

29-30 Յունիս 2024-ին, «Արամ Մանուկեան» կեդրոնը գումարուեցաւ Հայ Օգնութեան Միութեան (ՀՕՄ) Հայաստանի 30-րդ Շրջանային Պատգամաւորական ժողովը։ ՀՕՄի Հայաստանի Շրջանային Վարչութեան ատենապետ ընկհ. Մարօ Քէշիշեան ողջունելով ներկաները, հրաւիրեց զանոնք յոտնկայս ունկնդրելու Հայաստանի, Արցախի եւ ՀՕՄի քայլերգները, որոնց յաջորդեց մէկ վայրկեան լռութիւն, յարգելու յիշատակը մեզմէ առ յաւէտ բաժնուած բոլոր ՀՕՄուհիներուն, յատկապէս հանգուցել ատենապետուհի Շաղիկ Մարուխեանին եւ հայրենիքի պաշտպանական մարտերուն զոհուած հերոսներուն։

Ապա, ընկհ. Քէշիշեան գեղեցիկ անակնկալով մը, հրաւիրեց ընթացաւարտ Շրջանային Վարչութան անդամներն ու ՀՕՄի Կեդրոնական Վարչութեան անդամ ընկհ. Զոյա Քոչարեանը եւ գեղեցիկ յուշանուէրով պարգեւատրեց իւրաքանչիւրը, իրենց անցնող երկամեակի նուիրեալ ու անձնուէր ծառայութեան համար։ Ընկհ. Սօսի Պօղոսեան եւս վարդերով գնահատեց Շրջանային Վարչութեան իր գործակից ընկերուհիները։

Ժողովին ՀՕՄի Կեդրոնական Վարչութեան լիազօր ներկայացուցիչն էր ընկհ. Զոյա Քոչարեան, ՀՕՄի Արցախի միաւորինը՝ ընկհ. Մելանիա Բալայեանը, ՀՕՄի Ջաւախքի միաւորինը՝ ընկհ. Տիգրանուհի Ղարսեան։

Ժողովը ձեռնհասօրէն վարեցին ատենապետներ Լիզա Պապօղլեանն ու Նայիրի Յակոբեանը, իսկ քարտուղարի դժուարին պարտականութիւնը կատարեցին Վերքինէ Կիրակոսեանն ու Հռիփսիմէ Նահապետեանը։ Ընկհ. Զոյա Քոչարեան ներկայացուց ՀՕՄի Կեդրոնական Վարչութեան ամփոփ տեղեկագիրը, իսկ ընկհ. Մարօ Քէշիշեանը՝ ՀՕՄի Հայաստանի Շրջանային Վարչութեան երկամեայ գործունէութիւնը։ Զոյգ տեղեկագրերն ալ Power point-ով ներկայացուեցան։ 

Ժողովը մանրամասն անդրադարձաւ ընթացաւարտ Շրջանային վարչութեան բեղուն գործունէութեան վրայ եւ գերազանցելի աշխատանք նկատեց Սուրիոյ աւերիչ երկրաշարժէն տուժածներուն օգնութեան հասնիլը, ինչպէս նաեւ ինը ամիսներ շրջափակման մէջ մնալէ ետք բռնի տեղահանուած Արցահայութեան օժանդակութեան հսկայական աշխատանքները, Նոր կեդրոնի շինարարութիւնն ու մարզերու այցելութիւններն ու մասնաճիւղերու աշխատանքներու քաջալերանքը։ Այս բոլորի լոյսին տակ ժողովը ընդգծեց, թէ ընթացաւարտ Շրջանային Վարչութիւնը դժուարին երկամեակ մը դիմագրաւած է եւ կարողացած է յաղթահարել բոլոր դժուարութիւնները։ Ժողովականները միաձայնութեամբ «Յոյժ Գնահատելի» գտան ընթացաւարտ Շրջանային վարչութեան երկամեայ գործունէութիւնը։

Այնուհետեւ օգտաշատ բանաձեւերու որդեգրումէն ետք, ընտրուեցաւ 11 հոգինոց Շրջանային Վարչութեան նոր կազմ մը, որ նաեւ ժողովէն ետք գումարելով իր անդրանիկ ժողովը ընտրեց դիւանի իր կազմը։ Ստորեւ նորընտիր Շրջանային Վարչութեան կազմը.-

1. Մարօ Քէշիշեան՝ Ատենապետ

2. Վեհանոյշ Մարգարեան՝ փոխ-ատենապետ

3. Ռուզաննա Նահապետեան՝ ատենադպիր

4. Սօնա Սարաճեան՝ Գանձապահ

Խորհրդականներ.-

5. Արուս Միրզոյեան

6. Լուսինէ Մուքոյեան

7. Գոհար Մինասեաան

8. Թանիա Պապօղլեան

9. Էսմա Զարքարեան

10. Հռիփսիմէ Նահապետեան

11. Մարինէ Հայրապետեան