Հրատապ լուրեր:

Հայաստանի եւ Սփիւռքի առաջնահերթ խնդիրներէն մին հայապահպանութիւնն է. Նախարար Հրանոյշ Յակոբեան

Հայաստանի եւ Սփիւռքի առաջնահերթ խնդիրներէն մին  հայապահպանութիւնն է. Նախարար Հրանոյշ Յակոբեան

Հայաստանի եւ հայկական սփիւռքի համար կարեւորագոյն խնդիրներէն մէկը կը շարունակէ մնալ հայապահպանութիւնը: «Հայաստան-սփիւռք» 6-րդ համաժողովի փակման լիագումար նիստի ընթացքին յայտնած է ՀՀ սփիւռքի նախարար Հրանոյշ Յակոբեան:

 «Մեր հիմնական խնդիրներէն մէկը կը շարունակէ մնալ հայապահպանութեան հիմնահարցը, քանի որ բոլորս ալ կը հասկնանք, որ փոխուող աշխարհի մէջ կը  փոքրանան, կ՛ուծացուին հայկական համայնքները: Բայց ես համոզուած եմ, որ եթէ մենք պատասխանատու ձեւով, համատեղ շարունակենք մեր աշխատանքը, կարնանք մեր տիրոյթ բերել շատ հայեր: Մենք ինքնակազմակերպման խնդիր ունինք որոշ համայնքներու պարագային: Խառն ամուսնութիւններուն թիւը կ՛աւելնայ, մայրենի լեզուն կրողներուն թիւը կը նուազի, հայկական դպրոցները եւ մշակութային կեդրոնները կը փակուին, կան երկիրներ, ուր խնդիրներ կան հայկական մշակութային ժառանգութեան պահպանման համար»,- «Արմենփրես»-ի փոխանցմամբ` նշած է նախարարը:

Ան ըսած է, որ աշխարհի 118 երկիրներու մէջ հայկական համայնքներ կան, իսկ ատոնք ունին տարբեր կառուցուածք եւ տարբեր իրաւական կարգավիճակ: «Մենք ունինք քաղաքներ, գիւղեր, որոնք ամբողջապէս հայաբնակ են: Հայերուն բնորոշ է օտար միջավայրին արագ ընդելուզուիլը եւ ազգային դիմագիծերը պահելը: Հայերը կրնան շատ արագ համարկուիլ այլ երկիրներու հասարակական եւ տնտեսական կեանքին` պատիւ ստեղծելով հայ ազգին, Հայաստանի համար»,- ըսած է Յակոբեան:

Ան նաեւ յայտնած է, որ հայկական սփիւռքի մէջ ունինք 829 համայնք, 30 հազար հայկական կազմակերպութիւն, 38 համահայկական կազմակերպութիւն, 724 գործող եկեղեցիներ եւ վանքեր, հազարէ աւելի դպրոցներ, 637 մշակութային կեդրոններ: «Մենք ունինք հզօր կառուցուածքային միաւորներ, որոնք ստեղծուած են եւ կը գործեն հայապահպանութեան համար, իսկ հայապահպանութեան գլխաւոր զէնքը մեր երիտասարդութիւնն է»,- ըսած է ՀՀ սփիւռքի նախարարը: