image

Այնճարի հայութեան դէմ սպառնալիքներ չկան. Քաղաքապետ Վարդգէս Խօշեան

Այնճարի  հայութեան  դէմ սպառնալիքներ չկան. Քաղաքապետ Վարդգէս Խօշեան

«Այնճարի հայութեան դէմ սպառնալիքներ չկան»,-«Արեւելք»ին իր տուած       հարցազրոյցի  ընթացքին յայտնեց Այնճարի քաղաքապետ  Վարդգէս  Խօշեան: Քաղաքապետ Խօշեան, լուսաբանելով «Մաժտալ Այնճար»  գիւղին մէջ Էրտողանին առ ի զօրակցութիւն եղած հաւաքը, ըսաւ. «Ասկէ տասն օր  առաջ «Մաժտալ Այնճար»ի մէջ   Էրտողանին  ի զօրակցութիւն  եղած  հաւաքին մասնակիցներու  շարասիւնը  փորձեց  Այնճար մուտք գործել,  ու  մենք, առանց յաւելեալ  լարուածութիւն  ստեղծելու, յաջողեցանք արգելք  հանդիսանալ   եւ հեռացնել զանոնք   գիւղի մուտքէն»: Խօսելով շրջանին մէջ տիրող ընդհանուր ապահովութեան մթնոլորտին մասին, անցեալ մայիսին քաղաքապետի  պաշտօնին կոչուած Խօշեան ըսաւ. «Նախ ըսեմ, որ  Միջին Արեւելքի տարբեր երկիրներու, ինչպէս Սուրիոյ եւ  Իրաքի մէջ,  ընդհանուր ապահովական  իրավիճակը խոցելի է: Իսկ ինչ կը վերաբերի Այնճարին, ապա պէտք է ըսել, որ  տեղի հայութեան դէմ յատուկ սպառնալիքներ գոյութիւն չունին, բայց եւ այնպէս շրջանին մէջ տիրող հակաքրիստոնէական  ընդհանուր մթնոլորտը բնականաբար իր ազդեցութիւն կ'ունենայ  Այճարի եւ անոր  խաղաղ  բնակչութեան վրայ»: Խօշեան նաեւ դիտել տուաւ, որ պատկան մարմինները      անհրաժեշտ բոլոր քայլերը  առած են՝ պահպանելու համար գիւղի անվտանգութիւնը եւ  այս առումով ըսաւ.  «Վերջին  շրջանին թելադրուած    այս հանգրուանի   պահանջներէն  յաջողեցանք  մեր կապերը  եւ յարաբերութիւնները  զարգացնել դրացի բոլոր գիւղերուն հետ, որովհետեւ զգալի է նաեւ, որ  նոյնպէս մեզ շրջապատող գիւղերուն մէջ  ալ   ծայրայեղական   խմբաւորումներու կողմէ  թիրախ դառնալու մտահոգութիւններ կան եւ այդ մէկը  պատճառ դարձաւ առկայ   համագործակցութիւնը աւելիով    զարգացնելու»: Դաշնակցական  քաղաքապետը  նաեւ ըսաւ, որ յառաջիկայ   18 սեպտեմբերին  Այնճարի մէջ պիտի կատարուի   Մուսա Լերան հերոսամարտի  տօնախմբութիւնը, եւ այդ առումով իրենք ապահովական  յատուկ կարգադրութիւններ    գործի դրած են  այս առումով, յայտնելով. «Գիտէք, որ      Մուսա Լերան   հերոսամարտի  ոգեկոչման  առթիւ   Լիբանանի տարբեր շրջաններէն      մեծ թիւով հայորդիներ Այնճար    պիտի   հասնին ու այդ առումով է նաեւ, որ  մենք  ապահովական յատուկ կարգադրութիւններ    տեսած ենք  ու նոյնպէս  կապ հաստատած  շրջանին մէջ եղող  լիբանանեան   բանակի բարձրաստիճան պատասխանատուներուն   հետ անվտանգութեան  մակարդակի     բարձրացումը ապահովելու համար»:    Այնճարի քաղաքապետը խօսելով գիւղի   տնտեսական  իրավիճակին մասին  ըսաւ,  թէ  գիւղը  այս տարի ունեցած է փայլուն  բերք,  բայց եւ այնպէս Սուրիոյ պատերզամին  պատճառով   միջազգային ճանապարհներուն փակ  ըլլալը  մեծապէս վնասեց, որ Այնճարի  բերքը դէպի  արաբական ծոցի երկիրներ արտահանման աշխատանքները տուժեն»: Յիշեցնենք,  որ    Լիբանանի  մէջ  գտնուող  եւ միակ  հայկական  գիւղ համարուող   Այնճար  աւանը,  ինչպէս ամէն տարի այս տարի եւս՝  յառաջիկայ 18  Սեպտեմբերին պիտի նշէ Մուսա Լերան հերոսամարտի  101-րդ տարեդարձը: