Արցախի համար չի կրնար անվտանգութեան երաշխիք ըլլալ Ատրպէյճանի կազմին մէջ. Գերագոյն հոգեւոր խորհուրդի յայտարարութիւնը

Արցախի համար չի կրնար անվտանգութեան երաշխիք ըլլալ Ատրպէյճանի կազմին մէջ. Գերագոյն հոգեւոր խորհուրդի յայտարարութիւնը

Գերագոյն հոգեւոր խորհուրդը, նախագահութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, հանդէս է եկել յայտարարութեամբ։

 

ԳԵՐԱԳՈՅՆ ՀՈԳԵՒՈՐ ԽՈՐՀՐԴԻ ՅԱՅՏԱՐԱՐՈՒԹԻՒՆԸ

 

Արցախի Հանրապետութիւնը արդէն մէկ ամիս դիմակայում է Ադրբեջանի զինուած ուժերի լայնածաւալ յարձակմանը, որին բացայայտ իր մասնակցութիւնն է բերում Թուրքիան՝ ներգրաւելով ինչպէս միջազգային ահաբեկչական խմբաւորումների վարձկան գրոհայինների, այնպէս էլ թուրքական բանակի յատուկ ջոկատայինների եւ մատակարարելով գերժամանակակից մեծաքանակ զէնքեր: Ադրբեջանի ռազմաքաղաքական ղեկավարութիւնը այս ընթացքում կիրառելով իր ողջ զինանոցը, այդ թւում եւ միջազգայնօրէն արգելուած զինատեսակները, թիրախաւորում է Արցախի բնակավայրերը, նաեւ խնամատարական, կրթական, մշակութային եւ պաշտամունքային նշանակութեան բազմաթիւ շինութիւններ, ընդհուպ՝ Ստեփանակերտի ծննդատունը, ինչն աննախադէպ վարքագիծ է՝ անգամ ահաբեկչական խմբաւորումների վարքագծի տեսանկիւնից: Հայրենիքի պաշտպանութեան սրբազան պայքարում ունենք հարիւրաւոր վիրաւոր եւ նահատակ զինուորականներ, բնակավայրերի հրետակոծութեան հետեւանքով կան բազում վիրաւորուածներ եւ զոհեր խաղաղ բնակչութեան մէջ։

Արցախի ժողովրդի հանդէպ  իրականացուած այս ոճրագործութիւնների համար Ադրբեջանի Հանրապետութեան նախագահ Իլհամ Ալիեւը, ինչպէս նաեւ այդ ոճրագործութիւններին աջակցող եւ անմիջական մասնակից ռազմաքաղաքական միւս գործիչները պէտք է կանգնեն միջազգային դատական ատեանների առջեւ եւ պատասխանատուութեան ենթարկուեն իբրեւ մարդկութեան դէմ ուղղուած յանցագործութիւնների կազմակերպիչներ։

Գերագոյն հոգեւոր խորհուրդը կոչ է անում միջազգային հանրութեանը, ի մասնաւորի ԵԱՀԿ Մինսկի խմբի համանախագահող երկրներին, հաւատարիմ հակամարտութեան խաղաղ ճանապարհով կարգաւորման սկզբունքներին, առաւել գործնական, ազդեցիկ ու վճռական միջոցներ գործադրել արիւնահեղութեան կասեցման, տարածաշրջանում խաղաղութեան վերահաստատման եւ արցախահայութեան ինքնորոշման եւ պարզապէս մարդկանց կեանքի, ապրելու իրաւունքի իրացման համար: Արցախի հարցը ռազմական ճանապարհով վճռելու, արցախահայութեանը բնաջնջելու Ադրբեջանի քաղաքականութիւնը վերստին փաստում է այն իրողութիւնը, որ Արցախի համար չի կարող լինել անվտանգութեան երաշխիք Ադրբեջանի կազմում։

Գերագոյն հոգեւոր խորհուրդը բարձրօրէն գնահատում է Մինսկի խմբի համանախագահող երկրների հետեւողական ջանքերը՝ ուղղուած մարդասիրական հրադադարի հաստատմանը եւ պահպանութեանը, որը երրորդ անգամը լինելով, բացայայտ խախտւում է Ադրբեջանի կողմից: Լիայոյս ենք, որ Մինսկի խմբի համանախագահողների կողմից կը գտնուեն արցախեան հակամարտութեան յանգուցալուծման ուղիներ եւ մարդկային անմեղ կեանքերը չեն զոհաբերուի սոսկ աշխարհաքաղաքական շահերին: Այսօր Արցախը կարիք ունի համայն աշխարհի հումանիտար աջակցութեան։

Աղօթում ենք, որ Տէրը օրհնի Հայաստան եւ Արցախ մեր հայրենի երկիրը, ամենազօր Իր Սուրբ Աջի հովանու ներքոյ յոյսով ու հաւատքով զօրաւոր ու միասնական պահի մեր ժողովրդին եւ զօրացնի բազուկը հայրենեաց մեր քաջարի պաշտպանների։ 

Թող Ամենողորմ Աստուած խաղաղութեան մէջ պահի համայն աշխարհը՝ զերծ պատերազմի արհաւիրքներից, ցաւերից ու վշտերից։