13.09c
Երեվան
երք, ապր 29
Ամերիկյան մամուլն անդրադառնում է հայազգի բլոգեր, վլոգեր, դերասանուհի, YouTub-ի նորաձեւության աստղ համարվող Թենի Փանոսյանին, ով ունի միլիոնավոր հետեւորդներ ու բաժանորդներ սոցիալական կայքերում, սակայն նույնքան ճանաչված չէ, որքան իր նշանավոր հայրենակցուհին, որովհետեւ, ըստ նորաձեւության ամերիկյան լրատվամիջոցների, Թենին անդադար զբաղված է նորաձեւության կախարդական աշխարհ կերտելով եւ հեռու է աղմկահարույց պատմություններից: «Նա նորաձեւության օրենսդիր է, միշտ մի քայլ առաջ է ժամանակակից միտումներից եւ իր հետեւից տանում է բազմահազար մարդկանց, ովքեր ուզում են լինել Թենիի նման նուրբ եւ բարձրաճաշակ»,-գրում է մամուլը` Լոս Անջելեսում ապրող մեր հայրենակցուհու մասին:
Թենի Փանոսյանը ծնվել է Իրանում, ԱՄՆ է տեղափոխվել ընտանիքով: Փոքր տարիքից տարված է եղել նորաձեւությամբ եւ ԱՄՆ-ում համալսարաններ է ավարտել` տիրապետելով բարձրագույն նորաձեւության գաղտնիքներին եւ հանրային կառավարման մասնագիտություն է ստացել` մեկ այլ համալսարան ավարտելով:
Ի տարբերություն Քիմի, ում հետ աշխատում է դիմահարդարների, վարսահարդարների եւ դիզայներների մի ամբողջ խումբ, Թենին ինքն է անձամբ զբաղվում իր դիմահարդարմամբ, հագուստներով եւ կերպարի կերտմամբ: Ավելին` YouTub-ի իր ալիքում, Twitter-ում եւ բլոգում այդ գաղտնիքները փոխանցում է հազարավոր աղջիկների ու կանանց: Թենին զբաղվում է նաեւ բնակարանների, առանձնատների ներքին հարդարանքով եւ հաղորդումներ է պատրաստում այդ մասին: «Նա անվերջ ուսումնասիրում է եւ սեփական ուժերով հասել է առավելագույնին»,-գրում են հմայիչ հայուհու մասին:
Թենի Փանոսյանն ԱՄՆ-ում հայտնի է MissMaven անունով. հենց այդպես է կոչվում է հայուհու բլոգը: Բլոգում իր անձնական կյանքի մասին Թենին հակված չէ մանրամասներ ներկայացնելու, միայն նշում է, որ ունի երկու շուն: Նա կենդանիների իրավունքների պաշտպան է եւ երկարամյա բուսակեր:
Հայուհին զբաղվում է նաեւ դերասանությամբ: 2011-ին Disney ABC Television Group-ի կողմից ընտրվել է իբրեւ տաղանդավոր դերասանուհի` նկարահանվելով «Mac & Devin Go to High School» (2012), «Deadly Revenge» (2013) եւ «Perfect Combination» (2010) ֆիլմերում:
Մամուլն անդրադարձել է նաեւ ամերիկյան նորաձեւության երկու հայ առաջատարների արտաքին նմանություններին, գրելով, թե դեռեւս պարզ չէ` Թենի՞ն է նմանակում Քիմին, թե՞ վերջինս` իր գեղեցկուհի հայրենակցին:
