Հրատապ լուրեր:

Տեղի ունեցաւ Նախագահ Բակօ Սահակեանի երդմնակալութիւնը

Տեղի ունեցաւ Նախագահ   Բակօ Սահակեանի երդմնակալութիւնը

Այսօր տեղի ունեցաւ Արցախի Հանրապետութեան անցումային փուլի համար ընտրուած նախագահ Բակօ Սահակեանի երդմնակալութեան արարողութիւնը: Այս մասին կը հաղորդէ Artsakhpress.am-ը։

Նշենք, որ պաշտօնի ստանձնման օրէն սկսեալ՝ 20 օրուան ընթացքին, նորընտիր նախագահը պէտք է ձեւաւորէ կառավարութիւն եւ յայտարարէ կառավարութեան կազմը` ի տարբերութիւն նախորդ յետընտրական զարգացումներուն, երբ խորհրդարանը կը մասնակցէր կառավարութեան ձեւաւորման:

Կառավարութեան կազմաւորումէն ետք, եւս 20-օրուան ընթացքին, նորընտիր նախագահը կը հրապարակէ կառավարութեան գործունէութեան ծրագիրը:

Արցախի մէջ, սահմանադրական փոփոխութիւններու անցումային դրոյթներուն հետ կապուած, ԱԺ-ի կողմէ ընտրուած նախագահը պիտի պաշտօնավարէ մինչեւ գործող Ազգային ժողովի լիազօրութիւններուն աւարտը` 2020, որմէ ետք արդէն տեղի պիտի ունենան Արցախի նախագահի համապետական ընտրութիւններ:

Նշենք, որ Նոր Սահմանադրութեամբ  կառավարութիւնը պիտի ղեկավարէ նախագահը:

«Յառաջիկայ երեք տարին կ՝ակնկալուի շատ լուրջ աշխատանք` համակարգը յարմարցնելու սահմանարդութեամբ ձեւաւորուած նոր կառավարման համակարգին: Ատոր տակ պետական համակարգի բոլոր թեւերը իրենց ընելիքները ունին»,- յայտարարած է Արցախի ԱԺ նախագահ Աշոտ Ղուլեան: Անոր խօսքով, երեք տարիներու ընթացքին 80-է աւելի օրէնքներ կա՛մ պիտի ընդունին, կա՛մ եղած օրէնքներուն մէջ փոփոխութիւններ պիտի կատարեն. «Անոնց նպատակը պիտի ըլլայ գործող կառուցակարգերը բարեփոխելը»:

Յիշեցնենք, որ Յուլիս 19-ին Արցախի ԱԺ-ն երկրի նախագահ ընտրած էր Բակօ Սահակեանը: Ան, փաստօրէն, երրորդ անգամ է կը զբաղցնէ երկրի նախագահի պաշտօնը: