Սուզան Ալ Հաժ կալանաւորուած է Իթանիի գործով

Սուզան Ալ Հաժ կալանաւորուած է Իթանիի գործով

Դերասան Զիատ Իթանիի գործի քննութեան ծիրին մէջ ձերբակալուած է վերջինիս դէմ հաղորդում տուած Ներքին անվտանգութեան աշխատակից Սուզան Ալ Հաժ:

«Lebanon 24» լրատուական կայքին փոխանցմամբ, ռազմական դատարանի կողմէ իրականացուած քննութեան արդիւնքով պարզուած է այն քաղաքացիին ինքնութիւնը, որ ցանցահէնութեան դիմելով կեղծուած հեռախօսազրոյցներ եւ հաղորդագրութիւններ տարածած է, որոնք իբրեւ թէ տեղի ունեցած են Իթանիի եւ իսրայէլեան հեռուստակայանի մը միջեւ:

Աղբիւրը նշած է նաեւ, որ Սուզան Ալ Հաճ այս առթիւ հաղորդում ներկայացուցած է Իթանիի դէմ, նպատակ ունենալով որոշ ժամանակ առաջ իր դէմ Իթանիի արարքին վրէժը լուծել:

Խնդիրն  այն է, որ Իթանի ժամանակ մը առաջ Սուզան Ալ Հաժի կողմէ հաւանութեան արժանացած (Like) գրառում մը բացայայտած էր, ուր հեղինակը ծաղրի կ'ենթարկէր կիներուն ինքնաշարժ վարելու արտօնութիւն տուող Սէուտական Արաբիոյ որոշումը: Նշուած դէպքին հետեւանքով Ալ Հաճ պաշտօնի իջեցում ստացած էր: