image

Ռուսիոյ մէջ լրտեսութեան կասկածանքով ձերբակալուած է Wall Street Journal-ի թղթակիցը

Ռուսիոյ մէջ լրտեսութեան կասկածանքով ձերբակալուած է Wall Street Journal-ի թղթակիցը

Ռուսիոյ Դաշնութեան անվտանգութեան դաշնային ծառայութիւնը յայտնած է, որ Եքաթերինպուրկի մէջ ձերբակալուած է ամերիկեան Wall Street Journal պարբերականի թղթակից Էվան Կերշքովիչը։

Հետախուզութեան տուեալներով՝ լրագրողը «Միացեալ Նահանգներու յանձնարարութեամբ պետական գաղտնիք հանդիսացող տեղեկութիւններ կը հաւաքէր ռուսական ռազմաարդիւնաբերական համալիրի ձեռնարկութիւններէն մէկու մասին»։ 

Գերատեսչութիւնը պարզաբանած է, որ լրագրողը Եքաթերինպուրկի մէջ զբաղած է «անօրինական գործունէութեամբ», որ յաջողութեամբ «կասեցուած է»։ Յարուցուած է լրտեսութեան գործ։  

«Քոմերսանթ»-ի տեղեկութիւններով՝ լրագրողը կը նախատեսուի տեղափոխել Մոսկուա եւ կալանաւորել Լեֆորթովոյի դատարանին մէջ։

PR մասնագէտ Եարոսլաւ Շիրշիքովը, որ նախօրէին հանդիպած է Էվան Կերշքովիչի հետ, պնդած է, որ Եքաթերինպուրկի մէջ ձերբակալուած լրագրողը «ուսումնասիրած է հասարակութեան վերաբերմունքը PMC «Վակներ» մասնաւոր ռազմական ընկերութեան նկատմամբ»։

Էվան Կերշքովիչը 6 տարի է, որ կ'ապրէ Մոսկուայի մէջ եւ հաւատարմագրուած է Ռուսիոյ Արտաքին գործոց նախարարութեան մօտ։ Կերշքովիչը լրագրող է, որ կը լուսաբանէ իրադարձութիւնները Ռուսիոյ, Ուքրանիոյ եւ նախկին Խորհրդային Միութեան երկիրներու մէջ: Ան նախապէս աշխատած է Agence France-Presse-ի, The Moscow Times-ի եւ The New York Times-ի մէջ: Կերշքովիչի վերջին յօդուածը Wall Street Journal-ը հրապարակած է մարտ 28-ին։