Հայկական արմատներով ամերիկացի նշանավոր տնտեսագետ, ծագումով Թուրքիայից Տարոն Աճեմօղլուն hurriyetdailynews-ն տված հարցազրույցում անդրադարձել է Թուրքիայի տնտեսության ներկա իրավիճակին, նշելով, որ Թուրքիայի տնտեսության ստացած հարվածները գալիս են ներսից: Աճեմօղլուն նաեւ ասել է, որ հատկապես այս շրջանում Թուրքիան կարող է խուսափել ծանր տնտեսական տագնապից, եթե երկրի իշխանությունները որդեգրեն ներքին քաղաքական համաձայնությունների ընթացք: Համաշխարհային համբավ ունեցող տնտեսագետը նկատել է, որ Թուրքիայի տնտեսությանը վերջին տարիներին հաջողվել էր ցնցումներից հեռու մնալ` ապավինելով երկրում առկա դրամական պաշարների գոյությունը: Սակայն Տարոն Աճեմօղլուն մտահոգություն է հայտնել, որ քաղաքական ու անվտանգության առումով երկրի ներկա սրված վիճակի պատճառով այդ այդ պահուստները կարող են դուրս տարվել երկրից:
Ամերիկացի տնտեսագետը մատնանշել է ներկա ճգնաժամից դուրս գալու ելքը` Թուրքիան կարեւոր ռեֆորմներ պիտի անի թե' քաղաքական, թե' դատական համակարգերում` զերծ մնալու տնտեսական վտանգավոր ու սուր տագնապներից: Ըստ նրա, եթե Թուրքիայի քաղաքական ու դատական համակարգը բարեփոխվի, ապա արտաքին աշխարհը անզոր կլինի սասանել նրա տնտեսությունը: