Կանադական մամուլն անդրադառնում է Տորոնտոյի սիմֆոնիկ նվագախմբի համերգին, որը ղեկավարել է Թուրքիայից հայկական ծագումով կանադաբնակ նշանավոր դիրիժոր Նուրհան Արմանը: Համերգին հնչել են հայկական երգեր` աշխարհահռչակ օպերային երգչուհի Հասմիկ Պապյանի կատարմամբ: Toronto Centre for the Arts-ում նոյեմբերի 7-ին տեղի ունեցած համեգը կրել է «Մի մոռացիր ինձ» խորագիրը, եւ շարունակությունն է եղել Կանադայում այս տարվա ապրիլին Տորոնտոյի սիմֆոնիկ նվագախմբի մեկնարկած ոգեկոչման ծրագրին, որ նվիրված էր Հայոց Ցեղասպանության 100-րդ տարելիցին: Համերգին մասնակցել է Ռուսաստանում ծնված հայ ջութակահարուհի Նունե Մելիքյանը: «Ըստ էության աշխարհի տարբեր կողմերից` Թուրքիայից, Հայաստանից եւ Ռուսաստանից երեք հայ տաղանդավոր երաժիշտներ բացառիկ երեկո են պարգեւել կանադացի հանդիսատեսին` բարձր կատարողական արվեստով ներկայացնելով սեփական ազգի դարավոր երգն ու երաժշտությունը»-գրում է մամուլը, նշելով, որ Տորոնտոյի սիմֆոնիկը կատարել է Էդվարդ Միրզոյանի, Ալեքսանդր Հարությունյանի, Արամ Խաչատրյանի, Տիգրան Մանսուրյանի եւ Վաչե Շարաֆյանի ստեղծագործություններից:
Հասմիկ Պապյանն ու ջութակահարուհի Նունե Մելիքյանը` Տորոնտոյում