Խորհրդային Սոցիալիստական Հանրապետութիւններու Միութեան (ԽՍՀՄ) եւ Ռուսիոյ Դաշնութեան զինուած ուժերու զօրավար-լեյտենանտ, 1992-1995 թուականներու ՀՀ Պաշտպանութեան նախարարութեան գլխաւոր շտաբի պետ, 1993 թուականի պաշտպանութեան նախարարի պաշտօնակատար Նորատ Տէր-Գրիգորեանցը, մեկնաբանելով 13 սեպտեմբերին հայ-ատրպէյճանական սահմանին, ինչպէս նաեւ ՀՀ ինքնիշխան տարածքին Պաքուի սանձազերծած լայնամաշտաբ յարձակման, յայտարարած է, որ թշնամին Արցախը եւ Հայաստանը գրաւելու իր ծրագիրն ունի:
Զինուորականն այս մասին յայտնած է Ռուսիոյ հայերու միութեան գրասենեակին մէջ Ռուսիոյ հայերու միութեան (ՌՀՄ) նախագահ Արա Աբրահամեանի նախագահութեամբ կայացած հանդիպում-քննարկման ժամանակ, որու մասին հաղորդուած է ՌՀՄ դիմատետրեան էջէն:
«Զգուշացնում եմ՝ Փաշինեանը ոչնչացրեց Հայաստանի Հանրապետութեան զինուած ուժերի մարտունակութիւնը, փոխեց դրա կառուցուածքը, որը ես էի ստեղծել: Թշնամին Արցախն ու Հայաստանը գրաւելու իր ծրագիրն ունի. նա արդէն գնում է Երեւանի ուղղութեամբ։ Նրանք բանակը պատրաստում են ՆԱԹՕ-ի չափանիշներով», -ըսած է Տէր-Գրիգորեանցը հայ հասարակութեան ներկայացուցիչներու հետ հանդիպման:
Հանդիպման մասնակցած են Ռուսիոյ հայերու միութեան տարածաշրջանային մասնաճիւղերու ղեկավարներ, հասարակական գործիչներ, զինուորականներ, լրագրողներ, երիտասարդութեան, մարմնամարզութեան եւ տարբեր կազմակերպութիւններու ներկայացուցիչներ։
Քննարկման հիմնական թեման եղած է Հայաստանի եւ տարածաշրջանի մէջ տիրող իրավիճակը Հայաստանի վրայ Ատրպէյճանի յարձակումէն ետք։