Թուրքիոյ գլխաւոր ընդդիմադիր, քեմալական Հանրապետական ժողովուրդի կուսակցութեան Պոլսոյ նահանգային վարչութեան նախագահ Ճանան Քաֆթանճըօղլուի շուրջ հետաքննութիւնը սկսած էր 1,5 տարի առաջ: Ան կը մեղադրուէր «հրապարակաւ ատելութեան եւ թշնամանքի հրահրման», «ահաբեկչական կազմակերպութեան քարոզը կատարելու», «նախագահին վիրաւորելու», «հասարակական աշխատողին վարած պաշտօնին համար վիրաւորելու», «Թուրքիոյ հանրապետութիւնը հրապարակաւ նուաստացնելու» յանցանքով:
Պոլսոյ հանրապետական ընդհանուր դատախազութեան ահաբեկչութեան եւ կազմակերպուած յանցագործութիւններու դէմ պայքարի գրասենեակին կողմէ 15 յունուար 2018-ին սկսած հետաքննութեան իբրեւ արդիւնք պատրաստուած մեղադրական եզրակացութեան մէջ կը պահանջուէր 2 տարի 9 ամիսէն մինչեւ 11 տարի բանտարկութիւն: Այս մասին կը հաղորդէ թրքական «Սապահ» օրաթերթի կայքը:
Առաջադրուած մեղադրանքներուն համար հիմք ծառայած է 2012-2017 թուականներուն Քաֆթանճըօղլուի` ընկերային ցանցերուն վրայ կատարած հրապարակումները, որոնց մէջ ան կը քննադատէր Էրտողանը եւ Թուրքիոյ վարած ներքին քաղաքականութիւնը:
Քաֆթանճըօղլուի գրառումներուն մէջ տեղ գտած էին նաեւ Հայոց ցեղասպանութեան վերաբերեալ ակնարկութիւններ: Մասնաւորաբար` մեղադրականին մէջ տեղ գտած էր հետեւեալ գրառումը. «Պատմութեան մէջ այսօրուան պէս սկսաւ Հայոց ցեղասպանութիւնը: Կը յիշենք սպաննուած մեր հայ քաղաքացիները: 1915-ին: Թաքսիմի մէջ»: Սակայն ցուցմունքներու ժամանակ Քաֆթանճըօղլու յայտարարած է, թէ Ցեղասպանութեան նիւթով հրապարակումը իրեն չի պատկանիր, նոյն ատեն ընդունած է, որ մեղադրանքներուն համար հիմք ծառայած միւս բոլոր հրապարակումներուն հեղինակը ինքն է:
Բացի ատկէ, Քաֆթանճըօղլու 2013-ին Հայոց ցեղասպանութեան յիշատակի օրը` 24 ապրիլին, անգամ մը եւս գրառում կատարած էր «Թուիթըր»-ի վրայ. «Ապրիլի 23-ի յաջորդ օրը ի՞նչ օր էր: Անոնց համար, որոնք չեն ուզեր գիտնալ, յիշեցում. 1915 թուական»: