Թուրքիոյ Տիարպէքիր նահանգին մէջ գտնուող Սուրբ Կիրակոս եւ տեղի կաթոլիկ եկեղեցիներու վերականգնման աշխատանքները մեկնարկած են: Ֆինանսաւորումը կը կատարուի շրջակայ միջավայրի եւ քաղաքաշինութեան նախարարութեան կողմէ:
Այս մասին «Արմէնբրես»-ի հաղորդմամբ, կը տեղեկացնէ Dailysabah-ը, նշելով, որ կառավարութիւնը աշխատանքներու համար յատկացուցած է 15 միլիոն թրքական լիրա, որ պիտի վերահսկուի պետական հիմնադրամներու գլխաւոր տնօրէններու կողմէ:
Սուրբ Կիրակոս եկեղեցին կառուցուած է 1376 թուականին եւ այն կը համարուի ամենամեծ հայկական եկեղեցին Միջին Արեւելքի մէջ: 2012 թուականի նոյեմբերին 32 տարուան ընդմիջումէ ետք այստեղ կատարուած է վերանորոգման յաջորդած առաջին եկեղեցական արարողութիւնը: Նոյն օրը եկեղեցւոյ մէջ տեղի ունեցած է նաեւ առաջին պսակադրութիւնը: Սուրբ Կիրակոս եկեղեցւոյ վերանորոգման աշխատանքները իրագործուած են Պոլսոյ Հայոց պատրիարքարանի նիւթական աջակցութեամբ: Աշխատանքներուն աջակցութիւն ցուցաբերած է նաեւ Տիարպէքիրի քաղաքապետարանը:
2015 թուականին սակայն, Տիարպէքիրի մէջ թուրք–քրտական բախումներու պատճառով տեղի եկեղեցիները լուրջ վնաս կրած են: