Օրեր առաջ զազրելի ոճիր մը ցնցած է ամբողջ Հալէպը։ Այս մասին լուրը կը հաղորդէ «Շապաքաթ ախպար Հալապ» դիմատետրի էջը, որ նաեւ նշած է, թէ 7-ամեայ պատանի մը տանջանքներու ենթարկուելէ ետք սպաննուած է Հալէպի Սալահ Էլ Տին շրջանին մէջ։
Դէպքէն շաբաթ մը անց՝ այսօր, Հալէպի ապահովական մարմիններ բացայայտած են Նասրալլա Հիլալ Ալ Նասէր անունով պատանին սպաննողին ինքնութիւնը, որ 19-ամեայ երիտասարդ մըն է։
Պարզ դարձած է նաեւ, որ ոճրագործը բռնաբարած ու ապա սպաննած է պատանին, որ այդ շրջանի բնակիչներէն չէ եւ հոն յայտնուած է իր ընտանիքի անդամներուն հետ պատերազմի հետեւանքով։
Կը նշուի նաեւ, որ Հալէպի բնակչութիւնը, որ խստիւ դատապարտած է զազրելի այս ոճիրը, պատկան մարմիններէն պահանջած է խստագոյնս վարուիլ ոճրագործին հետ։
Դէպքին շուրջ կը կատարուի հետաքննութիւն։