Լիբանանի տիւրզի համայնքի առաջնորդներէն նախկին նախարար Ուալիտ Ժոմպլաթ կը շարունակէ գիրք նուիրելու իր յայտնի աւանդութիւնը:
Ան երէկ բարձրացած էր Պաապտայի նախագահական պալատ եւ իր սովորութեան համաձայն գիրքեր նուիրած էր նախագահ Աունին:
Ժոմպլաթ աւելի ուշ պատասխանելով լրագրողներուն հարցերուն, թէ ինչ գիրք նուիրած է նախագահ Աունին, ըսած է, որ ինք նախագահին նուիրած է «Lords Of The Desert» անունով խորագրեալ գիրքը, որուն հեղինակը՝ ճէյմըս Պար այս գիրքով կը ներկայացնէ բրիտանա-ամերիկեան վիճայարոյց յարաբերութիւնները եւ տարակարծութիւնները արաբական աշխարհին վերաբերեալ:
Ժոմպլաթ նաեւ ըսած է, որ Ճէյմըս Պար այն հեղինակն է, որ 4 տարիներ առաջ գրած է «A Line in the Sand» անունով խորագրեալ գիրք մը, ուր կը պատմէ, թէ ինչ պայմաններու տակ կազմուեցաւ Սայքս-Պիքօ պայմանագիրը:
Աւարտին ժոմպլաթ նշած է, որ նախագահ Աունին նուիրած է նաեւ իր հօր Քամալ ժոմպլաթի մասին վաւերագրական տեսանիւթերու շարք մը, որ վերջերս ցուցադրուած էր Փարիզի արաբական տան մէջ:
Յիշեցնենք, որ տիւրզի առաջնորդին համար սովորութիւն դարձած է որեւէ պաշտօնական հանդիպման ընթացքին հրաւիրեալ կամ հիւրընկալող կողմին նուիրել պատմաքաղաքական բնոյթի հատորներ: