Պէյրութի հայահոծ Տորա շրջանին մէջ տեղի ունեցած վէճէն ետք դանակահարուած է Գէորգ Ռազմիկ անունով հայորդի մը: Այս մասին լուրը կը փոխանցէ «Ուայնիյի ալ տաուլէ» դիմատետրի էջը:
Դէպքը պատահած է Տորա շրջանի Սիթի Սէնթր թաղամասին մէջ գործով «Marakyie» գիշերային ակումբին մօտ, ուր այդ ակումբի պահակներէն մին դանակի հարուածներ հասցուցած է 30-ամեայ երիտասարդ Գէորգ Ռազմիկին, որ ծանրօրէն վիրաւորուելէ ետք փոխադրուած է հիւանդանոց:
Աւելի ուշ պարզուած է, որ պահակը Ալի Սըպհի Մըսթոն անունով Սուրիոյ քաղաքացի մըն է:
Դէպքէն ժամեր անց Գէորգի ընտանիքը «Ուր է պետութիւնը» էջին միջոցաւ պետական անվտանգութեան մարմիններու ուշադրութեան յանձնած է պատահարը նշելով նաեւ, որ Անթիլիաս շրջանի ոստիկանատան մէջ անոնց դէմ ճնշումներ բանեցուած են խնդիրը փակելու եւ հաշտութեամբ աւարտելու:
Յիշեցնենք, որ դէպքը տեղի ունեցած է 6 մայիսին եւ ներկայիս Գէորգ կը գտնուի բժիշկներու խնամքին տակ: