Թուրքիոյ ընդդիմադիր քրտամէտ «Ժողովուրդներու դեմոկրատական կուսակցութեան» (HDP) պատգամաւոր, Տիարպէքիրի նախկին քաղաքապետ Օսման Պայտէմիր 12000 թրքական լիրայով (3200 տոլար) տուգանուած է մէճլիսի ամբիոնէն «Քիւրտիստան» բառը հնչեցնելու համար:
Ըստ թրքական «Demokrathaber.org»ին, այս մասին Պայտեմիրին տեղեկացուցած է մէճլիսի ֆինանսական հարցերու վարչութիւնը:
Թուրքիոյ խորհրդարանի պատմութեան մէջ առաջին անգամ Քիւրտիստան բառի համար կիրառուած տուգանքը կապուած է ամիսներ առաջ խորհրդարանի ներքին կանօնակարգի մէջ ընդունուած փոփոխութիւններու հետ:
Յիշեցնենք, որ ամիսներ առաջ Թուրքիոյ իշխող «Արդարութիւն եւ զարգացում» (AKP) եւ «Ազգայնական շարժում» (MHP) կուսակցութիւներու նախաձեռնութեամբ ընդունուած էր մէճլիսի նոր ներքին կանոնադրութիւն, որուն համաձայն կ'արգելուի «Հայոց ցեղասպանութիւն», «Քիւրտիստան», «քրտական նահանգներ» արտայայտութիւներու կիրառումը:
Ըստ այդ կանոնադրութեան՝ կարգազանց պատգամաւորները կը զրկուին 2 նիստի մասնակցելու իրաւունքէ եւ կը տուգանուին աշխատավարձի 2/3-ով: