Սեպտեմբերի 14-ի լույս 15-ի գիշերը Կարծախի վրաց-թուրքական փակ սահմանին կանխվել է երեխայի տեղափոխման դեպք: Ըստ միջազգային օրենքի, մանուկների անօրինական տեղափոխումը համարվում է մանկական թրաֆիքինգ: Ինչպես տեղեկանում ենք jnews.ge-ից, փորձել են նորածին տղային պայուսակի մեջ, ապօրինի եւ առանց փաստաթղթերի անցկացնել Թուրքիա:
Չնայած Կարծախի սահմանակետը պաշտոնապես դեռ չի գործում, այնուամենայնիվ փորձ է կատարվել հատել անցակետը: Վրաց սահմանապահները մեքենայի բեռնախցում հայտնաբերել են 60 տարեկան մի կնոջ եւ 1,5-2 ամսական երեխայի: Պարզվել է, որ երկու թուրք կին փորձել են մի կնոջ և մի երեխայի ապօրինի անցկացնել Թուրքիա: Թուրք կանայք ձերբակալվել են, իսկ փոքրիկին տեղափոխել են Ախալցխա: Հիվանդանոցում փոքրիկն անցել է բոլոր ստուգումները, նշվել է, որ նա առողջ է: Երեխային սահմանն անցկացնող կինը պնդել է, որ երեխան իր թոռն է: Նորածինն այժմ գտնվում է պետության կողմից վստահված խնամակալ ընտանիքում:
Վրաստանի Ներքին գործերի նախարարությունից հաստատել են տեղեկությունը, բայց հրաժարվել են մեկնաբանությունից, պատճառաբանելով, որ փաստի առթիվ տարվում է հետաքննություն: