Ռուսաստանի Արտաքին Գործոց նախարար՝ Սերկէյ Լաւրով յայտարարած է, որ հնարաւոր է ղարաբաղեան հակամարտութեան քաղաքական լուծում տալ եւ պատմած է, թէ ինչպէս: ՌԴ ԱԳ նախարարը այդ մասին յայտարարած է «Սփութնիք», «Քոմսոմոլսքաեայ փրաւտա» եւ «Կը խօսի Մոսկուան» ռատիոկայաններուն տուած հարցազրոյցին։
Լաւրովի խօսքով՝ առաջարկները, որոնք համանախագահները մշակած եւ կը շարունակեն մշակել, կը մնան բանակցութիւններու սեղանին։
Այն է՝
-Ղարաբաղի շուրջ հինգ շրջաններէն հայկական զօրքերու փուլ առ փուլ դուրս բերելը Ղարաբաղի անվտանգութեան երաշխիքներու պահպանմամբ եւ Հայաստանի ու Ղարաբաղի միջեւ յուսալի կապի ապահովմամբ մինչեւ Ղարաբաղի վերջնական կարգավիճակի որոշումը։
-Հետագային եւս երկու շրջաններու ազատում եւ Ղարաբաղի կարգավիճակի որոշում:
-Լեռնային Ղարաբաղի խաղաղութիւնը այս ամբողջ ընթացքին կը պահպանուի նաեւ խաղաղապահներու օգնութեամբ ։
«Այժմ այս տխուր իրադարձութիւնները պէտք է օգնեն աշխուժացնելու այդ գործընթացները, տեղւոյն անվտանգութեան հարցերու լուծման զուգահեռ»,- ըսած է Լաւրով։