Զուլալ Ծատուրեանը, որ երեխաներուն եւ ամուսինին հետ Պէյրութէն Երեւան տեղափոխուած է 3 տարի առաջ, «Ազատութեան» պատմած է Պէյրութի իր հարազատներուն վիճակին մասին եւ իր ապրումներուն՝ պայթումէն ետք:
Բնակարանը, ուր մինչեւ նաւահանգիստին մէջ տեղի ունեցած պայթումը ապրած են մայրը, հայրը եւ եղբայրը, գտնուած է նաւահանգիստէն ընդամէնը 400 մեթրի վրայ։ Սարսուռով կը յիշէ, թէ եղբայրը ինչպէս տեսակապի միջոցով ցոյց կու տար, թէ ինչ վիճակի մէջ յայտնուած են ընտանիքի անդամները:
«Մայրս կը գոռար, հայրս նստած չէր կրնար շարժիլ, ոտքերը ինչ եղած է, չենք գիտր: Պայթումի ճնշումէն գետին ինկած է, ինքն ալ չի գիտեր՝ ինչպէս: Շատ զօրաւոր ցաւեր ունի եւ պատռուածքներ ունի, որովհետեւ փշրուած ապակիները լեցուած են ոտքերուն: Դեռ շոքի մէջ են եւ անտուն, բարեկամներու մօտ են, չեն կրնար տունը մնալ, որովհետեւ մուտքի դուռը քանդուած է եւ ամբողջ պատուհանները չկան», - ըսած է Զուլալ Ծատուրեանը:
Մանրամասները՝ տեսանիւթին մէջ.