Ինչպէս աւելի վաղ գրած էինք` այսօր Երեւան ժամանած է Յորդանանի Հաշիմեան Թագաւորութեան գահակալ, Նորին Մեծութիւն Ապտալլա Երկրորդը:
«Արեւելք»ի տեղեկութիւններով, բարձրաստիճան հիւրի պաշտօնական այցի առաջին ընթրիքը եղած է «Տէրեան» ճաշարանին մէջ։ Բիւզանդ փողոցին վրայ գտնուող ճաշարանը հիմնադրուած է Սուրիոյ դէպքերուն հետեւանքով Հայաստան հաստատուած երկու ընտանիքներու կողմէ։
Ճաշարանը, որ շնորհիւ տքնաջան աշխատանքի յաջողած է մեծ վարկ վաստակիլ, կը մատուցէ միջինարեւելեան եւ արեւմտեան Հայաստանի աւանդական խոհանոցի ուտելիքներ:
Յորդանանի թագաւորը ընթրած է ՀՀ նախագահ Արմէն Սարգսեանին հետ, եւ աւելի ուշ հիւրերը լուսանկարուած են ճաշարանի աշխատողներուն, ինչպէս նաեւ՝ երաժիշտներուն ու երգիչներուն հետ։