Փարիզի մէջ, 87 տարեկանին մահացած է արուեստագէտ, նկարիչ, բարերար Լեւոն Առատեանը, որ արուեստի աշխարհի մէջ յայտնի է Sir L անունով:
Պէյրութի մէջ 1932-ին ծնած արուեստագէտը 1951-ին Փարիզ մեկնած է եւ սորված է Սորպոնի համալսարանին մէջ: Ունեցած է անհատական ցուցահանդէսներ, մասնակցած է խմբակայիններու եւ ճանաչում ձեռք բերած է Եւրոպայի մէջ:
1988-ի Սպիտակի երկրաշարժէն ետք Լեւոն Առատեանը միջազգային ճանաչում ունեցող նկարիչներու ցուցահանդէս կազմակերպած է եւ հաւաքուած 2 միլիոն ֆրանքը տրամադրած է Ֆրանսահայ բժիշկներու միութեան՝ աղէտի գօտիի մէջ ծրագիր իրականացնելու համար: Աջակցած է նաեւ հայաստանցի նկարիչներու, ինչպէս նաեւ Չարենցաւան քաղաքի մէջ հիմնած է գորգագործութեան արհեստանոց:
Լեւոն Առատեանը աշխոյժ գործունէութիւն ունեցած է նաեւ մարդու իրաւունքներու պաշտպանութեան ասպարէզի մէջ՝ ցուցահանդէսներով բարձրաձայնելով ցեղասպանութիւններու հարցը: Այդ թեմայով անոր կազմակերպած «Կեանքի երանգներ» ցուցահանդէսը 1990-ականներու սկիզբը շրջած է եւրոպական շարք մը քաղաքներ:
Լեւոն Առատեանի դիակեզման արարողութիւնը պիտի կայանայ 24 հոկտեմբերին՝ Փարիզի Պեր-Լաշեզ գերեզմանատան մէջ:
Տոն Ժուան»
«Սալոմէ»