23.09c
Երեվան
հնգ, ապր 18
Շուտով լոյս պիտի տեսնէ Սեւակ Արծրունիի հեղինակած «Մեր հնարաւոր ապագան» խորագրով գիրքը, որ հանրութեան պիտի ծանօթացնէ «Կառուցէ Հայաստան» նախագիծի գաղափարախօսութեան եւ տեսլականի հետ:
-Պարոն Արծրունի, մենք յաճախ Ձեզ հետ հարցազրոյց ունեցած ենք որպէս հասարակական, քաղաքական գործիչ: Այսօր, կարծես թէ, Ձեզ կրնանք դիմել բացառապէս որպէս գործարար: Այդպէ՞ս է:
Այո, այդպէս է: 1994 թուականին երբ հայութիւնը յաղթանակեց Արցախի ճակատին, այդ պահուն արդէն պարզ էր, որ Թուրքիան եւ Ատրպէյճանը պատերազմը տեղափոխած են տնտեսական եւ ժողովրդագրական դաշտ:
Այդ օրերէն մինչեւ 2000-ականները, մենք քաղաքական եւ հասարակական դաշտի մէջ մղուեցանք Արցախի, ազատագրուած տարածքներու պահպանման կամ ամրապնդման, ինչպէս նաեւ Հայաստանի սահմանային եւ Ջաւախքի ժողովրդագրական համաղէտի կանգնեցման առաքելութեան: Ժամանակը ցոյց տուաւ, որ Հայաստանի եւ համայն հայութեան ճակատագիրը այս պայքարին մէջ պիտի որոշուի:
-Այսօր ՀՀ անկախութեան տարեդարձն է: Ի՞նչ տուաւ մեզի մեր անկախութիւնը: Օրինակ, տուեալներ կան, որ անկախութեան տարիներէն ի վեր Հայաստանի բնակչութեան թիւը նուազած է: Կրնանք ըսե՞լ որ թուրք-ատրպէյճանական ճակատը յաջողութեան հասած է:
Նախ, ես համայն հայութիւնը կը շնորհաւորեմ մեր անկախութեան առթիւ: Պատասխանեմ ձեր հարցին. Ժողովրդագրութեան այդպիսի վիճակը՝ բնակչութեան թիւի կրճատումը, մեր ձախողութեան հետեւանքն է: Մենք չկարողացանք մեր մէջ զսպել ազատութեան, յաղթանակի եւ շրջափակման առաջացուցած արագ հարստացման խայծը եւ յայտնուեցանք տնտեսական, ընկերային եւ ժողովրդագրական աղէտի մէջ:
Մեր անկախութիւնը մեր ամենամեծ հարստութիւնն է, որ քիչ-քիչ կը հասուննայ: Իրականութեան մէջ, ոչ թէ քիչ-քիչ, այլ յարաբերաբար շատ արագ: Մէկ կեանքի ընթացքին մենք տարինք յաղթանակ, հռչակեցինք անկախութիւն, կառուցեցինք ազգային բանակ, հիմա ալ կը փորձենք ժողովրդավարութեան ճանապարհով ձեւաւորել կայացած պետական համակարգ: Սակայն մենք իրական անկախութիւն կ'ունենանք միայն այն ժամանակ, երբ ձեւաւորենք հզօր տնտեսութիւն: Այդ իսկ պատճառով 2010 թուականէն ետք ես մտայ գործարար դաշտ, որովհետեւ հասկցայ, որ թուրք-հայկական հաշտութեան հեռանկարը ձեռնտու չէ ներկայ աշխարհաքաղաքական դասաւորումներուն, եւ որ Հայաստանն ու հայութիւնը պարտաւոր են ընդունիլ տնտեսական պատերազմի մարտահրաւէրը եւ յաղթել այդ պատերազմին:
-Հայաստանի մէջ տեղի ունեցած իշխանափոխութենէն ետք մօտ մէկ տարի ձեր եւ ձեր հիմնարկներու գործունէութիւնը դանդաղեցաւ: Ի՞նչն էր ատոր պատճառը, որ տարբեր հարթակներու վրայ տարբեր մարդոց առիթ տուաւ ձեր հասցէին ու ձեր նախաձեռնութեան մասին չարախօսութիւններու:
Այո, եղեր է ճգնաժամ, եղեր է հարկային մարմիններու ծայրաստիճան կոշտ վերաբերմունք՝ մեր գործերու նկատմամբ, սակայն մենք կատարած ենք մեր բոլոր պարտաւորութիւնները եւ յաղթահարած ենք ստեղծուած իրավիճակը: Գիտէք, երբ կը մտնես գործարար դաշտ, պէտք է պատրաստ ըլլաս առերեսուելու նման խնդիրներու: Գործարարի կեանքը հարուստ է վերիվայրումներով:
Հայութիւնը անցած է զարգացման նոր հարթութիւն, որ նոյնքան կարեւոր է մեր ճակատագրի համար, որքան՝ արցախեան ճակատին մեր արձանագրած յաղթանակը:
2018 թուականի ժողովրդային ցասումը միայն հիանալի օգուտ կրնար տալ մեր երկրի եւ ժողովուրդի զարգացման հեռանկարներուն: Այդ առումով երկու կարծիք չի կրնար ըլլալ:
Ինչ կը վերաբերի չարախօսութիւններուն. գիտէք՝ մենք բնակարաններ կը վաճառենք հիմնական հայրենադարձներու, եւ մեր մօտ արձանագրուած շինարարական աշխատանքներու ուշացումը անմիջական ազդեցութիւն ունեցաւ մարդոց ներգաղթի ծրագրերուն վրայ: Հիմա կը փորձենք օր ու գիշեր ամէն ինչ ընել՝ հնարաւորինս վերականգնելով կորսուած ժամանակը:
-Տարբեր առիթներով յայտարարած էք, որ Հայաստանի մէջ իրականացուող ձեր ծրագրերու հիմքը, արմատը հայրենադարձութեան խթանումն է։ Այսօ՞ր ալ նոյնն է տեսլականը: Ի՞նչ կրնաք ըսել այդ մասին։
Ես ոչ միայն յայտարարած եմ, այլեւ ապացուցած եմ, որ այդպէս է: Երբ մուտք կը գործէի բնակարանաշինութեան ոլորտ, Միջին Արեւելքի մէջ մարդիկ ձեռնպահ էին Հայաստանի մէջ գոյք ձեռք բերելու հարցով. գոյութիւն ունեցող սառոյցը մե՛նք ջարդած ենք, եւ այսօր՝ չորս տարի ետք մօտ 300 հայ ընտանիք տեղաւորուած է մեր բնակարաններուն մէջ, եւս 400-ն ալ պիտի տեղաւորուի յառաջիկայ երկու տարիներուն:
Իսկ սա, Հայաստանին տուած է ուղղակի եւ անուղղակի խոշոր օգուտներ. որոնցմէ են՝ տնտեսական գիտելիքներու կարեւոր ներդրում Հայաստանի տնտեսութեան մէջ, աշխատատեղերու ստեղծում, Հայաստանի մէջ ապրելու առումով տրամադրութիւններու կտրուկ փոփոխութիւն՝ Միջին Արեւելքի մէջ եւ այլն:
Մէկ հանգամանք եւս, մինչեւ մեր դաշտ մուտք գործելը՝ Հայաստանի մէջ գոյք ձեռք կը բերէին հիմնական հարուստ սփիւքահայերը, որոնք բնակարան կամ հողամաս կ'առնէին հիմնական որպէս ներդրում կամ լաւագոյն պարագային՝ ամառանոց: Մենք կարողացանք միջին խաւի սփիւռքահայերուն աժան բնակարաններ առաջարկել եւ կարեւոր դիւրութիւններ տալ անոնց՝ բնակարաններու ձեռք բերման ֆինանսական գործիքներ առաջարկելով:
Սուրիոյ պատերազմէն եւ Լիբանանի ու Քուէյթի տնտեսական ճգնաժամերէն ետք մեր առաջարկած նախագիծերը Հայաստանի մէջ շատ գործարարներու համար մոտել ծառայեցին՝ սփիւռքահայերուն անշարժ գոյք վաճառելու համար:
Այսօր մենք այդ շուկան կը կիսենք շատ նորաստեղծ ընկերութիւններու հետ, սակայն 2015 թուականին մենք միակն էինք եւ կրնանք ըսել, որ մենք ձեւաւորած ենք այդ շուկան: Իսկ ատոր արդիւնքը Հայաստանի տնտեսութեան հզօրացման հեռանկարին մէջ կարեւոր գործօն է, անտարակոյս:
-Այսօրուայ Հայաստանի իշխանութիւններու տեսակէտը՝ հայրենադարձութեան հանդէպ, ինչպիսի՞ն է: Եւ ինչպիսի՞ն է անոնց վերաբերմունքը ձեր ունեցած ներդրումներու ու ապագայ տեսալականներու նկատմամբ։
Ներկայ իշխանութիւնները չեն գործեր հայրենադարձութեան ուղղութեամբ, սակայն անոնց ստեղծած մթնոլորտը եւ որոշ նախաձեռնութիւններ կը խրախուսեն սփիւռքահայութիւնը՝ բնակելու հայրենիքի մէջ: Կարեւորը այդ է, հաւատացէք: Ես կը հաւատամ այն տեսութեան, որ պետութեան գործը մղելն ու դիւրացնելն է, իսկ հայրենադարձութիւնը տնտեսական ոլորտին մէջ տեղի պիտի ունենայ, եւ այստեղ է որ մենք երկրորդ անգամ պիտի շրջենք մեր ազգի ճակատագիրը:
-Օրերս նամակով դիմեցիք ձեր հիմնադրած «ԵՌԱՆԱՒ» կազմակերպութեան մեծ ընտանիքին՝ նշելով, որ յառաջիկային ընթացք պիտի տաք շինարարական կարեւոր եւ բաւական մեծ ծրագիրներու։ Ինչի՞ մասին է խօսքը:
Այո, մենք արդէն սկսած ենք երկու նոր թաղամասի շինարարութիւն, մէկը Աջափնեակ համայնքի մէջ է, միւսը օրերս պիտի սկսինք Դաւթաշէնի մէջ:
Սակայն կարեւորագոյն նախագիծը, որ 2018 թուականի մայիսէն ստեղծուած է, եւ այս աշնան յայտնի պիտի դառնայ հանրութեան, «Կառուցէ Հայաստան» նախագիծն է:
-Մերձաւոր Արեւելքի մէջ կարեւոր զարգացումներ կը գրանցուին, ու նաեւ զգալի է, որ հայութեան մեծ տոկոս կայ, որ ցանկութիւն ունի լքելու Միջին Արեւելքի երբեմնի շէն գաղութները։ Դուք այդ մասին ի՞նչ կը մտածէք: «Կառուցէ Հայաստան» նախագիծի հայեցակարգին մէջ այդ գաղութներու ներուժը Հայաստան փոխադրելու մասին իրական մօտեցումներ կա՞ն։
Ոչ միայն՝ Միջին Արեւելքի, այլեւ ամբողջ աշխարհի մէջ, նոյնիսկ հարուստ Եւրոպայի մէջ տնտեսական լճացում է: Եւրոպայէն գործարաններն ու աշխատատեղերը կը տեղափոխուին Ամերիկա եւ Ծայրագոյն Արեւելք: Այս պայմաններուն մէջ մենք կը յայտնուինք աննախադէպ մեծ պատեհութեան մը առջեւ, որու նպատակն է հայութեան ժողովրդագրական, տնտեսական եւ գիտելիքներու անսահման ներուժը տեղափոխել Հայաստան կամ առնուազն դարձնել հայաստանակեդրոն:
Մեր նպատակը պէտք է ըլլայ Հայաստանը դարձնել ոչ միայն բարեկարգ եւ բարգաւաճ երկիր, այլ նաեւ երրորդ հազարամեակի համաշխարհային քաղաքակրթութեան ջահակիր երկիր: Իսկ ինչպէ՞ս: Այդ ամէնու մասին շուտով կը կարդաք իմ հեղինակած գիրքիս մէջ, որ կը կոչուի «Մեր հնարաւոր ապագան»: Այն լոյս պիտի տեսնէ եկող օրերուն՝ համայն հայութեան ճանաչելի դարձնելով Վարդան Սերմաքէշի հետ մեր նախաձեռնած «Կառուցէ Հայաստան» նախագիծի հայեցակարգը:
-Ներկայ պայմաններուն մէջ նման առաքելութիւն իրականացնելը իսկապէ՞ս իրատեսական է:
Նախ Հայաստանի մէջ ու անոր շուրջ ձեւաւորուող մթնոլորտը, տնտեսական բարեփոխումները, հզօր եւ հայրենասէր գործարար Վարդան Սիրմաքէշի հետ մեր համագործակցութիւնը, «Կառուցէ Հայաստան» նախագիծի շուրջ հաւաքուած տեսլականի, խորհրդականներու, փորձագէտներու եւ գործընկերներու հոյակապ մարդոց շրջապատը, մեր անցած տասնամեակներու փորձն ու գաղափարակիցներու ցանցը կը հաւատացնեն մեզ, որ այո՛, մենք ազգովին ունինք բաւարար ներուժ՝ ստանձնելու քաղաքական եւ տնտեսական համաշխարհային դերակատարութիւն:
