18.09c
Երեվան
ուրբ, ապր 19
Օրերս իր մահկանացուն կնքած է Լիբանանի քաղաքացիական պատերազմի մասնակից եւ առաջին քրիստոնեայ կին մարտիկ՝ Ժոսլին Խուայրին (65 տարեկան)։
Այս մասին լուրը կը հաղորդէ «Ալ Նահար» պարբերականը, նշելով, որ երկար ժամանակէ ի վեր ծանր հիւանդութեան դէմ պայքարած Խուայրին Լիբանանի քաղաքացիական պատերազմի երկար տարիներուն յայտնի եղած է որպէս «Փաղանգաւոր» կուսակցութեան ամենաճանչցուած կինը, ան յայտնի դարձած էր որպէս առաջին կինը, որ զէնք շալկած եւ կռուած է Պէյրութի կեդրոնական ճակատին վրայ: Ան եղած է Փաղանգաւորներու կիներու յատուկ ջոկատի հրամանատարը:
Ժոսլին իր ճարտար պատերազմողի եւ առաքինի մարտիկի յատկանիշներով դարձած էր Լիբանանի մէջ պաղեստինեան ռազմական ներկայութեան դէմ անդուլ պայքար տարած քրիստոնէական դիմադրութեան խորհրդանիշներէն մին։
Ժոսլինը մահուան բօթը գուժած է նաեւ Լիբանանի «Փաղանգաւոր» կուսակցութիւնը, ինչպէս նաեւ կուսակցութեան ղեկավար, երեսփոխան Սամի Ալ-Ժըմայէլը, թուիթըրեան իր էջին գրելով. «Պիտի չսգամ մահդ, որովհետեւ հերոսներուն համար արցունք չեն թափեր, այլ դափնիներ կը բարձրացնեն: Ինչպէս որ պայքարող էիր կեանքիդ մէջ, նոյնպէս ալ հպարտութեամբ հեռացար, սրտիդ մէջ կրելով խրորխտ հայրենիքը, որուն համար պատրաստ էիր նահատակուիլ ...»
