Սուրիոյ նախագահ Պաշշար Ասատ ցաւակցական հեռագիր մը յղած է Ռուսաստանի Դաշնութեան նախագահ Վլատիմիր Փութինին, Լաթաքիոյ վերեւ տեղի ունեցած ծանր դէպքին վերաբերեալ:
Հեռագրին մէջ Ասատ մասնաւորապէս նշած է, որ Սուրիոյ մէջ իրենց մարդկային բարձր եւ վսեմ պարտականութիւնը կատարող ռուս զինուորները Սուրիոյ համար նահատակներ են: Ան նաեւ նշած է, որ տեղի ունեցած դէպքը արդիւնք է Իսրայէլի անբարոյ վարքագիծին, որ վերջին շրջանին սկսած է դառնալ յաճախակի:
Ասատի խօսքով Իսրայէլ առաջին անգամը չէ որ նման արարքներով հանդէս կու գայ եւ կը փորձէ ամենաստոր միջոցները ծառայեցնել յանուն իր դարանակալ ծրագիրներուն:
Խօսքի աւարտին Ասատ նաեւ իր ցաւակցական խօսքը յղած է ամբողջ Ռուսիոյ բարեկամ ժողովուրդին, նշելով, որ ինչպէս երէկ, այսօր եւս Ռուսաստան կը հանդիսանայ Սուրիոյ գլխաւոր դաշնակիցը:
Յիշեցնենք, որ օրեր առաջ Լաթաքիոյ երկինքին վերեւ սուրիական հակաօդային խարիսխներու կողմէ սխալմամբ արձակուած հրթիռնրեու հետեւանքով վար առնուած էր ռուսական հետախուզական «ԻԼ-20» օդանաւը, որուն մէջ կային ռուս 14 զինուորներ:
Օդանաւը շատ հաւանաբար ինկած էր Միջերկրականի ջուրերուն մէջ եւ անոր 14 զիուորականներէ բաղկացած անձնակազմը ամբողջութեամբ զոհուած էր: