Սուրիական բանակը, ռուսական օդուժի օժանդակութեամբ, կարեւոր յարձակում գործադրեց Ռաքքայի հարաւ արեւմուտքը գտնուող քարիւղի հանքերու ուղղութեամբ:
«Ալ Ախպարիյէ Էլ Սուրիյէ» ալիքի հաղորդած տեղեկութիւններուն համաձայն, զօրքը վերատիրացած է Ալուահապ, Ալֆահտ, Տպիսան, Ալքէյսար, Ապու Ալ Քըթաթ, Ապու Քաթթաշ եւ Ռաքքայի հարաւ արեւմուտքի այլ գիւղերու քարիւղի հանքերուն:
Նշենք, որ այդ հանքերը կը գտնուին Ռասաֆայի հարաւը, որ ,անցեալ ամիս զօրքը ծայրայեղականներուն ձեռքէն կրցած էր ազատագրել:
Սուրիական աղբիւրներու համաձայն, ամենանոր առաջընթացը կը համարուի զօրքի տարածումը Համայի արեւելքէն մինչեւ Հոմսի արեւելքը եւ Ռաքքայի ու Տէր Ալ Զօրի շրջակայքը:
Նշենք, որ անցեալ մայիսին, ռուսական օդուժը, Միջերկրական ծովը գտնուող զինուորական նաւերէն, Քրուզ ռուսական հրթիռներով ծանր հարուածներու ենթարկեց Ուքէյրիպաթ շրջանը, ուր կը գտնուին ծայրայեղականները:
Զօրքի յաջորդ նշանակէտն է Սուրիոյ արեւելքը, Իրաքի սահմանին գտնուող Ալսուխնա գիւղաքաղաքի ազատագրումն է: Այս գիղաքաղաքը Սուրիոյ ծայրայեղականներու վերջին ամենամեծ կեդրոնը կը համարուի, եթէ Ռաքքայի մէջ կորսնցնեն իրենց զօրութիւնը:
Քանի մը օր առաջ սուրիական բանակը եւ Իրանի հովանաւորութիւնը վայելող զինակից ուժերը յայտարարեցին, որ մեծ յաջողութիւններ արձանագրած են Հին Թատմորի հիւսիս-արեւելքը՝ վերատիրանալով Ղազ Ալ Հիլի հանքին, որ կը գտնուի Ալսուխնէէն 18 քլմ. հեռաւորութեան վրայ: