14.09c
Երեվան
շբթ, ապր 20
Հանրապետութեան նախագահ Արմէն Սարգսեանը առարկութիւններով վերադարձուցած է ՀՀ զինուած ուժերու գլխաւոր շտաբի պետ, զօրավար-գնդապետ Օնիկ Գասպարեանը պաշտօնէն ազատելու վերաբերեալ հրամանագրի նախագիծը: Այս մասին տեղեկացուցած են ՀՀ նախագահի աշխատակազմի հասարակայնութեան հետ կապերու վարչութենէն:
Յայտարարութեան մէջ ըսուած է. «2021թ. փետրուարի 25-ին Հանրապետութեան նախագահին է ներկայացուել ՀՀ զինուած ուժերի գլխաւոր շտաբի պետ, զօրավար-գնդապետ Օնիկ Գասպարեանին պաշտօնից ազատելու վերաբերեալ առաջարկութիւնը՝ համապատասխան հրամանագրի նախագծով:
Առաջարկութեան կապակցութեամբ Հանրապետութեան նախագահը խորհրդատուութիւններ եւ հանդիպումներ է ունեցել իշխանութեան ներկայացուցիչների, խորհրդարանական եւ արտախորհրդարանական ուժերի, զինուած ուժերի բարձրագոյն հրամանատարական կազմի հետ:
Հրամանագրի նախագիծն ուսումնասիրուել է Հանրապետութեան նախագահի աշխատակազմում, ամենայն մանրամասնութեամբ քննարկուել է առաջատար իրաւաբանների եւ անկախ փորձագէտների հետ:
Իրաւաբանների եւ փորձագէտների տեսակէտներն ամփոփելով՝ կարելի է եզրակացնել, որ հրամանագրի նախագիծն առերեւոյթ հակասում է Սահմանադրութեանը:
Մէկ անգամ եւս շեշտում ենք, որ Հանրապետութեան նախագահը չի պաշտպանում որեւէ քաղաքական ուժի եւ որոշումները կայացնում է՝ առաջնորդուելով բացառապէս համապետական եւ համազգային շահերով:
Անվիճելի է, որ զինուած ուժերը քաղաքական հարցերում պէտք է պահպանեն չէզոքութիւն:
Ակնյայտ է նաեւ, որ պատերազմով պայմանաւորուած՝ զինուած ուժերի անձնակազմն այսօր աւելի քան երբեւէ բոլորիս աջակցութեան եւ ուշադրութեան կարիքն ունի: Բանակի եւ անձնակազմի խնդիրների լուծումն առաջնային է եւ չի կարող որեւէ պարագայում անտեսուել:
Ստեղծուած իրավիճակն աննախադէպ է, պահանջում է համակարգային եւ համապարփակ լուծումներ եւ չի կարող կարգաւորուել քատրային յաճախակի փոփոխութիւնների միջոցով՝ առանց հաշուի առնելու երկրում առկայ վիճակը:
Յիշեցնում ենք, որ հրամանագրի նախագիծը Հանրապետութեան նախագահին է ներկայացուել զինուած ուժերի գլխաւոր շտաբի պետի եւ գլխաւոր շտաբի աւելի քան չորս տասնեակ բարձրաստիճան զինուորական պաշտօնեաների յայտարարութիւնից յետոյ, ռազմական դրութեան իրավիճակում, քաղաքական ճգնաժամի եւ անվտանգային լուրջ մարտահրաւէրների առկայութեան պայմաններում:
Հանրապետութեան նախագահը, իր սահմանադրական լիազօրութիւնների շրջանակում, առարկութիւններով վերադարձրել է հրամանագրի նախագիծը:
Հանրապետութեան նախագահը հետապնդում է մէկ նպատակ՝ երկիրը զերծ պահել սահմանադրական կարգին ու անվտանգութեանը սպառնացող վտանգներից, ապահովել երկրի կայունութիւնը եւ զինուած ուժերի բնականոն գործունէութիւնը»:
