8.09c
Երեվան
շբթ, ապր 20
Մայր Աթոռ Սուրբ Էջմիածնից Հայրապետական Մեր օրհնութիւնն ենք բերում մեր բանակի սպաներին ու զինուորներին եւ համայն մեր ժողովրդին Բանակի օրուայ առիթով:
Դարերի ընթացքին մեր բոլոր պայքարների բովում հայ զինուորը ցուցաբերել է մեծ արիութիւն ու անձնուիրում՝ հերոսաբար պաշտպանելով երկիր հայրենին եւ հարազատ ժողովրդին։ Արցախի պաշտպանութեան համար մղուած պատերազմներում Հայոց բանակի քաջարի զօրահրամանատարներն ու զինուորները, որոնց թուում ազգային փոքրամասնութիւնների խրոխտ զաւակներ, նոյն խիզախ ոգով հերոսաբար պայքարեցին յանուն հայրենիքի, եւ շատեր իրենց կեանքը նուիրեցին՝ ի սէր հայրենեաց եւ ազգի։
Այս տարի Բանակի տօնը դիմաւորում ենք պատերազմի ողբերգական հետեւանքների ցաւը մեր հոգում։ Ստեղծուած նոր մարտահրաւէրներին ընդառաջ, հաւատում ենք, աշխարհասփիւռ ազգս հայոց առ Աստուած ապաւինութեամբ եւ մեր անցեալի յաղթանակների ոգով պիտի կերտի նոր յաջողութիւններ ու ձեռքբերումներ, վերականգնի բարօր ու շէն կեանքը Արցախում եւ Հայաստանում՝ նաեւ ի պանծացումն յանուն հայրենեաց զոհուած մեր զաւակների խնկելի յիշատակի։
Աղօթում ենք առ Բարձրեալն Աստուած՝ հայցելով, որ Իր խնամքի ներքոյ պահպանի հայրենիքի պաշտպան Մեր սիրեցեալ զաւակներին եւ շնորհի անվտանգ ծառայութիւն։ Թող Տէրն Ամենակալ Իր օրհնութիւնն ու ողորմութիւնը տարածի համայն մեր ժողովրդի վրայ ի հայրենիս եւ ի սփիւռս, այսօր եւ միշտ. ամէն:
