Արցախի Հանրապետութեան նախագահ Արայիկ Յարութիւնեանը տեսաուղերձով դիմած է հայ ժողովուրդին: Խօսած է 27 սեպտեմբերէն Ատրպէյճանի, Թուրքիոյ եւ միջազգային ահաբեկչութեան կողմէ Արցախի դէմ սկսած լայնածաւալ պատերազմական գործողութիւնները շարունակելու մասին, նշած է, որ Պաշտպանութեան բանակը այդ ընթացքին շարունակած է հերոսաբար դիմադրել եւ ուժգին հակահարուածներ հասցնել թշնամիին՝ պատճառելով անոր մարդկային ու ռազմական սարքերու կորուստներ: Յարութիւնեանը խօսած է մարտերու ընթացքին իրենց լաւագոյնս դրսեւորած Մայր Հայաստանէն եւ Սփիւռքէն ժամանած մեր հայրենակիցներուն, հայրենիքի պաշտպանութեան գործին մէջ մեծ ներդրում ունեցած եւ պատերազմական հարուստ փորձ ունեցող մեր ընկերներուն, նաեւ ժամկէտային հերոս երիտասարդներուն մասին:
«Մենք կը տեսնենք նաեւ ՌԴ եւ միջազգային հանրութեան աշխոյժ ջանքերը պատերազմական գործողութիւններու դադարեցման ուղղութեամբ եւ բարձր կը գնահատենք այդ առաքելութիւնը: Վերջերս եռակողմ ձեւաչափով տեղի ունեցած է հանդիպում Մոսկուայի մէջ ՌԴ նախագահի նախաձեռնութեամբ եւ յայտարարութիւն պիտի կատարուի գոնէ մարդասիրական հրադադարի հետ կապուած եւ հետագային բանակցութիւնները վերսկսելու համար: Բայց ի՞նչ տեղի ունեցած է: Հակառակը, հակառակորդը օգտուելով առիթէն, արդէն այդ յայտարարութեան յաջորդ օրէն սկսած է աւելի հուժկու մարտական գործողութիւններ ճակատի համարեայ ամբողջ երկայնքով՝ մանաւանդ հարաւային ուղղութեամբ, եւ հակառակորդը յաջողած է ինչ-որ տեղ մխրճուիլ, ինչ-որ տեղ ունենալ առաւելութիւններ եւ օր օրի ճակատը տեղափոխել աւելի խոր տարածքներ, կը հասկնանք, որ զինադադար ստիպելու համար ունինք ընդամէնը մէկ ճանապարհ՝ պարտադրել զինադադար»,- նշած է Արայիկ Յարութիւնեանը: