16.09c
Երեվան
հնգ, ապր 25
Սեպտեմբերի 3-ին եւ 4-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում հիւրընկալեց Արարատեան Հայրապետական թեմի քաղաքամայր Երեւանի եւ Արարատի մարզի հոգեւոր տեսչութեան հոգեւոր սպասաւորներին` գլխաւորութեամբ Արարատեան Հայրապետական թեմի առաջնորդական փոխանորդ Գերաշնորհ Տ. Նաւասարդ արքեպիսկոպոս Կճոյեանի եւ Արարատի մարզի հոգեւոր տեսուչ Գերաշնորհ Տ. Գեւորգ եպիսկոպոս Սարոյեանի:
Հանդիպումներին Հանրակրթութեան պետական չափորոշչի եւ առարկայական չափորոշիչների նախագծերի, դրանցում առկայ խնդիրների եւ հնչեցուած մտահոգութիւնների շուրջ զեկոյց ներկայացրեց Մայր Աթոռ Սուրբ Էջմիածնի Քրիստոնէական դաստիարակութեան կենտրոնի տնօրէն Հոգեշնորհ Տ․ Զաքարիա ծայրագոյն վարդապետ Բաղումեանը՝ անդրադառնալով նաեւ «Հայոց Եկեղեցու պատմութիւն» առարկայի շուրջ ստեղծուած կացութեանը։
Ծաւալուն քննարկման ընթացքում քահանայ հայրերն իրենց համայնքների անունից մտահոգութիւնն արտայայտեցին կրթական բարեփոխումների իրականացմանը միտուած փաստաթղթերի մշակման գործընթացի, մտաւորականների եւ գիտակրթական հաստատութիւնների կողմից բարձրաձայնուած խնդիրների եւ ակնկալուող վերջնարդիւնքների առնչութեամբ՝ կարեւոր նկատելով ազգային նկարագրով, հոգեւոր-ազգային արժեհամակարգով ամուր հայորդու, ՀՀ քաղաքացու ձեւաւորումը։ Անընդունելի նկատուեց նաեւ «Հայոց Եկեղեցու պատմութիւն» առարկայի առնչութեամբ ԿԳՄՍ նախարարութեան որդեգրած մօտեցումը, որի հետեւանքով այլ առարկաների մէջ տարրալուծման ճանապարհով դուրս է մղւում ուսուցանուող առարկայի ուսումնական նիւթի գերակշիռ մասը, աղճատւում առարկայի նպատակն ու առաքելութիւնը՝ կերտելու հայ ինքնութիւնը եւ ամբողջապէս հաղորդ դարձնելու աշակերտներին Հայոց Եկեղեցուն, նրա դաւանանքին, տօնածիսական համակարգին, խորհուրդներին, քրիստոնէական ու ազգային արժեհամակարգի հիմնարար սկզբունքներին եւ քրիստոնէական բարոյագիտութեանը:
Կարեւորելով Եկեղեցու առաքելութիւնը քրիստոնէական-ազգային արժեհամակարգի կերտման ու պահպանման գործում, նրա կրթադաստիարակչական գործունէութիւնը եւ հովուական աշխատանքում սերտ կապն ուսումնական հաստատութիւնների հետ՝ հոգեւոր սպասաւորները մտահոգիչ նկատեցին վերջին ժամանակներում դպրոցներում եւ կրթական այլ հաստատութիւններում անցկացուող ազգային-եկեղեցական տօներին նուիրուած միջոցառումներին հոգեւորականների ներգրաւման եւ մասնակցութեան հարցում տնօրինութիւնների կողմից դրսեւորուող զգուշաւոր եւ մերժողական կեցուածքը:
«Կենսաբանութիւն» առարկայի պետական առարկայական չափորոշչում Էւոլիւցիոն տեսութեան եւ առարկայական չափորոշիչների նախագծերում սեռական դաստիարակութեանը վերաբերուող թեմաների մասին զեկոյց ներկայացրեց Դիւանատան եկեղեցական-ժողովական գրասենեակի պատասխանատու Արժանապատիւ Տ. Տիգրան քահանայ Բադիրեանը` մասնաւորաբար անդրադառնալով այդ կապակցութեամբ կեանքի եւ ընտանիքի սրբութեան հասկացութիւններին: Համացանցային գրագիտութեան եւ հոգեւոր քարոզչութեան նպատակով սոցիալական ցանցերի արդիւնաւէտ գործածութեան հնարաւորութիւնների մասին զեկոյցով հանդէս եկաւ Համացանցային ծառայութիւնների գրասենեակի տնօրէն Արժանապատիւ Տ. Համբարձում քահանայ Դանիէլեանը:
Նկատի ունենալով տեղեկատուական տեխնոլոգիաների եւ սոցցանցերի հսկայական ազդեցութիւնը հասարակութեան կեանքում` ներկայացուած նիւթի շուրջ քննարկումներում կարեւորուեց հոգեւոր հովիւների կողմից այդ միջոցների ծառայեցումը հոգեւոր արժէքների սերմանման եւ թեմական ու հովուական աշխատանքի լուսաբանման գործին:
Սոցցանցերում գռեհկաբանութեան, գործածուող լեզուի եւ տիրող անհանդուրժողողական մթնոլորտի վերացման հարցում կարեւորուեց նաեւ հոգեւոր սպասաւորների ակտիւութիւնը եւ հետեւողական աշխատանքը:
Զրոյցի ընթացքում Ամենայն Հայոց Կաթողիկոսը հանգամանօրէն անդրադարձաւ քահանայ հայրերի բարձրաձայնած հարցերին, որոնք վերաբերում էին հովուական ծառայութեանը, Եկեղեցու կրթադաստիարակչական եւ սոցիալական առաքելութեանը, համաւարակի շրջանում առկայ դժուարութիւնների յաղթահարմանը, ազգային եւ հայրենական կեանքը յուզող զանազան խնդիրների առնչութեամբ Եկեղեցու որդեգրած դիրքորոշումներին:
Վերջում Հայոց Հովուապետն իր հայրական օրհնութիւնը փոխանցեց քահանայ հայրերին` յորդորելով ակտիւ, նախանձախնդիր եւ համարձակ լինել հովուական ծառայութեան մէջ՝ նպաստելով Եկեղեցու առաքելութեան առաւել արդիւնաւորմանը։ Ամենայն Հայոց Կաթողիկոսն ընդգծեց, որ Հայոց Եկեղեցու առաքելութիւնը բոլոր ժամանակներում եղել է սպասաւորութիւնը հայ ժողովրդին` յանուն նրա հոգեւոր զօրացման, ազգային ինքնութեան պահպանման, ազգային նուիրական իղձերի իրականացման եւ հայրենիքի անկախ ու խաղաղ կեանքի կերտման:
