19.09c
Երեվան
հնգ, ապր 18
Սփիւռքահայ արձակագիր, հասարակական գործիչ Հայկ Նագգաշեանի անուան ամենամեայ գրական մրցանակի յաղթողը այս տարի Ֆելիքս Եղիազարեանն է: Բանաստեղծ-լրագրողը գրական շրջանակին յայտնի է Յուսիկ Արա անունով: Առաջին տեղը գրողը զբաղեցուցած է իր «Եւ սէրը ասաց» բանաստեղծական գիրքով:
Երեւանի մէջ տեղի ունեցած մրցանակաբաշխութեան ներկայ «Արեւելք»ի թղթակիցը կը տեղեկացնէ, որ գրական մրցոյթը, որ հիմնադրած է Հայկ Նագգաշեանի ընտանիքը, կը կայանայ արդէն 2-րդ տարին եւ, ինչպէս տեղեկացանք, շարունակական պիտի ըլլայ: Գրողի այրին՝ Սօսի Նագգաշեանը, ողջոյնի իր խօսքին մէջ շնորհաւորելով եւ շնորհակալութիւն յայտնելով մասնակիցներուն, նշած է. «Դուք հայ գրականութեան մէջ Ձեր ներդումը կատարեցիք՝ այն ճոխացնելով: Տուիք Ձեր սրտէն ու հոգիէն: Կը մաղթեմ բեղուն գրիչ, անսպառ ուժ եւ կարողութիւն՝ նորանոր հատորներ հրատարակելու համար: Շնորհակալութիւն կը յայտնեմ գնահատիչ մարմնի անդամներուն եւս, որ սիրով իրենց ժամանակը տրամադրած են ընթերցելու եւ արժեւորելու մասնակից հեղինակներու գիրքերը»:
Մրցոյթը առաջին տարին միջազգային մաշտապներով էր. մասնակիցներու շարքին կային նաեւ արտասահմանցի հեղինակներ: Իսկ յաղթող ճանչցուած էր երիտասարդ բանաստեղծուհի Անի Ամսէյեանը:
Այս տարի մասնակից գրողները աւելի քիչ էին եւ միայն՝ Հայաստանէն: Եօթ հեղինակ ներկայացուցած էին իրենց՝ տարբեր ժանրերու ստեղծագործութիւնները՝ բանաստեղծութիւններու, պատմուածքներու ժողովածուներէն մինչեւ վէպեր:
Նագգաշեանները կը սերին Սեբաստիայէն. «Մենք կը պատկանինք նախշ ընողներու ընտանիքին, այդ պատճառով ալ կոչուեցանք Նագգաշեան: Հայրս եւ Հայկ Նագգաշեանը երկու եղբայրներու որդիներ են: Մեր ընտանիքը ունի երեք հիմնական մասնագիտութիւն՝ գորգագործութիւն-նկարչութիւն, ուսուցչութիւն եւ երրորդը՝ գրող-բանաստեղծներ: Հայկ Նագգշեանի հայրը՝ Վահան Նագգշեանը, Լիբանանի մէջ հիմնած է հայկական առաջին վարժարանը՝ փայտեայ խարխուլ սենեակի մէջ, սակայն՝ հայու եւ Նագգաշեանի ոգիով: Այսպիսին ենք հայերս. ուր երթանք, դպրոց կը հիմնենք, միութիւն կը ստեղծենք: Շատ ուրախ եմ, որ այս մրցանակը հիմնուեցաւ, Հայկ Նագգաշեանը որպէս գրող եւ ազգային գործիչ, արժանի է, որ իր անունը յաւերժ հնչէ»,- ըսած է սաղիմահայ բանաստեղծուհի Անուշ Նագգաշեանը:
Իրինա Հախունց
