14.09c
Երեվան
ուրբ, ապր 19
Յուլիսի 3-ին, Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի նախագահութեամբ, տեղի ունեցաւ Մայր Աթոռ Սուրբ Էջմիածնի Գեւորգեան հոգեւոր ճեմարանի 2018-2019 ուսումնական տարուայ փակման հանդիսաւոր արարողութիւնը:
Միջոցառումը բացուեց Տէրունական աղօթքով, որից յետոյ հնչեցին ՀՀ եւ Գեւորգեան ճեմարանի օրհներգերը: Այնուհետեւ բացման խօսքով հանդէս եկաւ ճեմարանի տեսուչ Հոգեշնորհ Տ. Գարեգին վարդապետ Համբարձումեանը:
«Մեր 145-ամեայ ճեմարանում հայոց հայրապետների օրհնութեան ներքոյ մշտապէս կերտուել ու պատրաստուել են այնպիսի անհատներ, ում համար ազգն ու Եկեղեցին, դրանց առնչուող իւրաքանչիւր խնդիր դարձել է սեփական: Այսօր էլ մեր ճեմարանը շարունակում է ընթանալ բարի աւանդոյթով՝ առաջնորդելով մեր սաների մէջ ոչ թէ պաշտօն փնտրելու, այլ պաշտօն մատուցելու ցանկութիւնը արմատաւորելու սկզբունքով»,- ընդգծեց Հայր Սուրբը՝ մաղթելով շրջանաւարտներին իրենց իւրաքանչիւր քայլն անելուց առաջ յիշել եւ հետեւել Տէր Յիսուս Քրիստոսին նմանուելու Իր իսկ պատգամին:
Այնուհետեւ Հայր Գարեգինը ներկայացրեց անցնող ուսումնական տարուայ գործունէութիւնը` մասնաւորապէս անդրադառնալով ճեմարանականների մասնակցութեանը մշակութային տարբեր միջոցառումներին, բուհական գիտաժողովներին, օտարերկրեայ մասնագէտների հետ հանդիպումներին, ինչպէս նաեւ Կոմիտաս վարդապետի եւ Յովհաննէս Թումանեանի 150-ամեակին նուիրուած հանդիսութիւններին ունեցած ելոյթներին:
Ճեմարանականների մէջ հոգեւոր արժէքների սերմանման մեծ եւ պատասխանատու գործում իրենց անհամեմատ ներդրման համար՝ Հայր Սուրբը շնորհակալական խօսք յղեց նաեւ աշխարհական եւ հոգեւորական դասախօսներին, տեսչութեան անդամներին, վերակացու քահանաներին ու սարկաւագներին:
Աւարտելով խօսքը՝ ճեմարանի տեսուչն իր որդիական սէրն ու խոնարհումը յայտնեց Ամենայն Հայոց Հայրապետին ճեմարանի հանդէպ հոգածու վերաբերմունքի եւ հայրական խնամքի համար:
Ապա երաժշտական կատարումներով հանդէս եկաւ Գեւորգեան հոգեւոր ճեմարանի երգչախումբը՝ ղեկավարութեամբ Արտաշէս Բաբուրեանի:
Ցերեկոյթի ընթացքում ներկաներին ողջունեցին նաեւ ճեմարանի դասախօսներ Մայր Աթոռի Քրիստոնէական դաստիարակութեան կենտրոնի տնօրէն Հոգեշնորհ Տ. Զաքարիա ծայրագոյն վարդապետ Բաղումեանը, ֆիզ. մաթ. գիտութիւնների թեկնածու Գրիգոր Բրուտեանը, իսկ ուսանողութեան անունից երախտագիտութեան խօսքով հանդէս եկաւ Զ լսարանի սան Գալուստ սարկաւագ Վարդանեանը:
Հանդիսութեան ընթացքում կատարուեց նաեւ նուիրաբաշխութիւն: Նորին Սրբութիւնն ուսման մէջ բարձր առաջադիմութեան, կարգապահութեան եւ այլ արժանիքների դրսեւորման համար պարգեւներ յանձնեց տարբեր լսարանների սաներին:
Միջոցառումն ամփոփուեց Նորին Սրբութիւն Գարեգին Երկրորդ Ամենայն Հայոց Կաթողիկոսի օրհնութեան խօսքով:
«Ճեմարանական իւրաքանչիւր ուսումնական շրջանի արդիւնաւորումը կարեւոր ձեռքբերում է հոգեւորականների պատրաստութեան գործում եւ գնահատելի գովարժան նպաստ հաւատաւոր մեր ժողովրդին տէրունապատուէր ծառայութիւն մատուցելու առաքելութեանը: …Մեզ համար հոգեւորականների պատրաստութեան գործում առաջնային են ոչ միայն ճեմարանի տուած հարուստ գիտելիքները, փորձառու եւ հմուտ դասախօսների միջոցով մատուցուած իմացութիւնը, այլեւ դրա հետ մէկտեղ հոգեւոր դաստիարակութիւնը եւ հոգեւոր կերպարի կերտումը: Հոգեւոր ասպարէզում արժանաւորութեամբ սպասաւորելու, աստուածային շնորհները հաւատացեալներին բաշխելու եւ մարդկանց համար Քրիստոսանման օրինակ լինելու առաքելութեան մէջ անօգուտ կը լինի իմացութեան լոյսը, եթէ չկայ հաւատքի լոյսը, եթէ չկայ հաւատի ապրումը, աղօթքի ոգին ու ջերմեռանդութիւնը, Աստծոյ հետ մշտական հաղորդակցութեան, աստուածային ներկայութեան բարի զգացումը»,- նշեց Վեհափառ Հայրապետը՝ հաստատելով, որ հոգեւորականների համար իրենց կեանքով ու գործով ուղենիշ են Սուրբ Եկեղեցու հայրերը, եկեղեցական մեծանուն հեղինակները, ովքեր հմուտ էին բնական գիտութիւնների, լեզուների իմացութեան, փիլիսոփայութեան, քերականութեան, պատմութեան եւ գիտելեաց այլ բնագաւառներում: Նորին Սրբութիւնը նշեց, որ վերջիններիս մեծութիւնը կայանում է նրանց կարողութիւնները հոգեւորով պայծառացնելու, աղօթքներով զարդարելու, մարդկանց հոգիները շահելու, հաւատացեալներին դէպի փրկութիւն եւ յաւիտենական կեանք առաջնորդելու նախանձախնդիր սպասաւորութեան մէջ:
Վեհափառ Հայրապետը գոհունակութեամբ փաստեց, որ Գեւորգեան հոգեւոր ճեմարանի գործունէութեան մէջ ներգրաւուած են բարձրակարգ, ճանաչուած, ծառայանուէր դասախօսներ, որոնք նաեւ ազգասէր եւ եկեղեցասէր, բարեպաշտ անձեր են եւ իրենց վարքով ու հաւատաւոր ոգով են ձեւաւորում, դարբնում ապագայ եկեղեցականներին՝ կարեւորելով նաեւ հոգեւորական դասախօսների դերը ճեմարանականների կրթութեան եւ հոգեկերտման գործում: Այս առիթով Նորին Սրբութիւնն իր գնահատանքը փոխանցեց ճեմարանի տեսչին, տեսչական ու դասախօսական կազմին՝ յորդորելով նոյն նուիրումով, աննուազ նախանձախնդրութեամբ շարունակել ամենայն ջանք ու եռանդ ներդնել եկեղեցականների պատրաստութեան շնորհակալ առաքելութեան մէջ:
Այնուհետեւ Վեհափառ Հայրապետը, իր օրհնութիւնը բերելով ճեմարանի սաներին, մասնաւորապէս ասաց. «Սիրելի սաներ, շրջանաւարտներ, հայրական սիրով ձեզ եւս բերում ենք Մեր յորդորը, որ միշտ նախանձախնդիր լինէք ուսումնառութեան մէջ, շարունակաբար զարգացնէք ձեր հոգեւոր փորձառութիւնը, ըմպէք այն առատ աղբիւրից, որ բխեցնում են մեր Սուրբ Եկեղեցու երանելի հայրերը իրենց աշխատութիւններով, Սուրբ Գրքի ուսուցումներով, բարի ու շահաւէտ պատգամներով: Մեր շատ գիւղեր ու քաղաքներ, հայաստանեան եւ աշխարհասփիւռ ծուխեր, թեմեր հոգեւորականների կարիքն ունեն եւ փափագով ձեզ են սպասում, որպէսզի դուք, ստանձնելով Քրիստոսի առաքեալը լինելու յանձնառութիւնը, Աւետարանի լոյսը, Տիրոջ կենարար վարդապետութիւնը, մեր Սուրբ Եկեղեցու սէրն ու հոգածութիւնը տարածէք մեր ժողովրդի մէջ, լինէք Աստծոյ արժանաւոր մշակներ: Մեր ժամանակների բազում նոր մարտահրաւէրների առջեւ անհրաժեշտ է, որպէսզի դուք, աստուածաշնչեան իմաստունի պատգամի համաձայն, սիրէք իմաստութիւնը եւ հաճոյք գտնէք գիտութեան մէջ, լինէք կորովի ու բանիմաց անձեր՝ տէրունապատուէր սպասաւորութեան ճանապարհին ձեր կարողութիւնները ծառայեցնելու մեր Սուրբ Եկեղեցու պայծառութեան եւ հաւատաւոր մեր ժողովրդի հոգեւոր կեանքի շինութեան ու առաջընթացի համար»:
Վերջում Ամենայն Հայոց Կաթողիկոսը մաղթեց, որպէսզի Երկնաւոր Տէրն Իր ամենախնամ Սուրբ Աջի հովանու ներքոյ պահի ու պահպանի ամէնքին եւ նորանոր ձեռքբերումներով բարեզարդի Գեւորգեան հոգեւոր ճեմարանի առաքելութիւնը՝ ի փառս Աստծու, ի պայծառութիւն Հայաստանեայց Առաքելական մեր Սուրբ Եկեղեցու:
Ցերեկոյթը փակուեց հայրապետական «Պահպանիչ» աղօթքով:
2018-2019 ուսումնական տարում ճեմարանն ունեցել է 82 ուսանող, հաստատութիւնում դասաւանդել է 59 դասախօս: Այս տարի ճեմարանն աւարտեց 16 սան:
