19.09c
Երեվան
հնգ, ապր 25
16 Մարտին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնի միաբանների ուղեկցութեամբ այցելեց Գիւմրի:
Եօթվերք Ս. Աստուածածին առաջնորդարանիստ եկեղեցւոյ առջեւ Նորին Սրբութեան դիմաւորեցին Շիրակի թեմի առաջնորդ Գերաշնորհ Տ. Միքայէլ արքեպիսկոպոս Աջապահեանը եւ Գիւմրիի քաղաքապետ Սամուէլ Բալասանեանը: Զանգերու ղօղանջների ներքոյ Վեհափառ Հայրապետը շքախումբով, եկեղեցւոյ սպասաւորներու եւ հաւատացելոց ուղեկցութեամբ, մուտք գործեց եկեղեցի, ուր կատարուեց աղօթք, որմէ ետք Նորին Սրբութիւնն օրհնեց ներկայ ժողովրդը:
Այնուհետեւ Շիրակի թեմի առաջնորդարանէն ներս Ամենայն Հայոց Կաթողիկոսը հանդիպում ունեցաւ Շիրակի մարզպետ Տիգրան Պետրոսեանի եւ Գիւմրիի քաղաքապետ Սամուէլ Բալասանեանի հետ: Նորին Սրբութիւնը հետաքրքրուեցաւ Գիւմրիի եւ Շիրակի մարզի մէջ իրականացուող զարգացման տարբեր ծրագրերով, առկայ հիմնախնդիրներով եւ մարզի բնակչութեան դիմագրաւած մարտահրաւէրներով: Հանդիպման ընթացքին խօսուեցաւ նաեւ ի խնդիր ժողովուրդի բարօր կեանքի` քաղաքային ու մարզային իշխանութիւններու եւ թեմի միջեւ առկայ համագործակցութեան, ինչպէս նաեւ փոխգործակցութեան յետագայ ծրագրերու մասին:
Վեհափառ Հայրապետն այցելեց նաեւ «Թռչունեան տուն» դպրոց եւ երեխաներու աջակցութեան կեդրոն, ծանօթացաւ հաստատութենէն ներս խնամուող երեխաներու հետ:
Նորին Սրբութիւնը եղաւ նաեւ Մայր Աթոռի եւ ՀԲԸՄ հովանիի ներքոյ գործող Գիւմրիի Հայորդեաց տունը, ուր տնօրէն Աստղիկ Եդիգարեանի ուղեկցութեամբ հանդիպեցաւ տարբեր խմբակներու մէջ ուսանող պատանիներու եւ մանուկներու հետ` անոնց բաշխելով իր հայրական օրհնութիւնն ու գնահատանքը:
1988-ի երկրաշարժի 30-րդ տարելիցի առիթով, երկրաշարժի հետեւանքով տուժած եւ առ այսօր տնակներու մէջ բնակող ընտանիքներուն բնակարաններով ապահովելու նպատակով Մայր Աթոռի նախաձեռնած ընկերային նոր ծրագրի շրջանակէն ներս, Մայր Աթոռ Ս. Էջմիածինն իր աշխարհասփիւռ թեմերով դեկտեմբեր եւ յունուար ամիսներուն տասը ընտանիքներու ընծայած է բնակարաններ` եօթը` Գիւմրի քաղաքի, երեքը` Սպիտակի մէջ:
Ծրագրին իրենց աջակցութիւնը բերած են ԱՄՆ Հայոց Արեւելեան եւ Արեւմտեան թեմերը, Գերմանիոյ եւ Եգիպտոսի հայոց թեմերը, Ռուսաստանի եւ Նոր Նախիջեւանի հայոց թեմը, Հարաւային Ռուսաստանի հայոց թեմը, Մեծ Բրիտանիոյ եւ Իռլանտայի հայոց թեմը եւ Հնդկաստանի հայոց հոգեւոր հովուութիւնը:
Գիւմրի այցելութեան ընթացքին Ամենայն Հայոց Կաթողիկոսը անակնկալ այցելեց բնակարան ստացած ընտանիքներէն Մանուկեան ընտանիքին: Շնորհաւորելով Մանուկեանները բնակարանամուտի առիթով` Գարեգին Բ Կաթողիկոսն իր օրհնութիւններն ու բարեմաղթանքները բերաւ ընտանիքի անդամներուն եւ անոնց յանձնեց բնակարանի վկայականը:
Ընտանիքի կրտսեր անդամներուն ընծայելով Մանուկներու Աստուածաշունչ եւ այլ նուէրներ` Վեհափառ Հայրապետն ընտանիքին նուիրեց մանրանկար-սրբապատկեր, ապա եկեղեցականաց հետ աղօթք բարձրացուց առ Աստուած Մանուկեան ընտանիքի բարօր եւ խաղաղ կեանքի համար:
Օրուայ աւարտին թեմակալ առաջնորդի եւ եկեղեցականներու ուղեկցութեամբ Ամենայն Հայոց Կաթողիկոսն այցելեց Գիւմրիի Ս. Յակոբ եկեղեցի: Գոհաբանական աղօթքէն ետք Նորին Սրբութիւնն իր օրհնութիւնը բերաւ ներկայ բարեպաշտ հայորդիներուն:
