image
Հրատապ լուրեր:

Որոշած եմ կասեցնել իմ անդամակցութիւնը Հանրապետական կուսակցութեան․ Արփինէ Յովհաննիսեան

Որոշած եմ կասեցնել իմ անդամակցութիւնը Հանրապետական կուսակցութեան․ Արփինէ Յովհաննիսեան

Արփինէ Յովհաննիսեանը ֆէյսպուքեան գրառմամբ տեղեկացուցած է իր յառաջիկայ հասարակական-քաղաքական գործունէութեան ոլորտները եւ յայտնած, որ որոշած է դուրս գալ ՀՀԿ շարքերէն։ Գրառման մէջ ըսուած է․

«Առաջիկայ անելիքներիս եւ կուսակցական գործունէութեան մասին

Յարգելի գործընկերներ,

2018 թուականի խորհրդարանական ընտրութիւններն առիթ դարձան 16 տարի պետական ծառայութիւնից (16 տարիներից եօթը աքթիւ քաղաքական գործունէութեան շրջան էր) յետոյ մտածել գործունէութեան նոր ուղղութիւնների մասին։ Ես միշտ եղել եմ այն կարծիքին, որ պատասխանատու պահերին ամենավատ որոշումը, որ կարելի է կայացնել, ուղղակի դիտորդի դերը ստանձնելն է։ Չեմ արել դա նախկինում, չեմ անելու նաեւ այժմ: Դա է պատճառը, որ լսելի լինելու, երկրում կատարուող իրադարձութիւններին արձագանգելու համար ես ընտրում եմ գործունէութեան հետեւեալ տեսակները.

• Անցած շաբաթ ստացայ փաստաբանական գործունէութեան արտօնագիրս եւ կը միանամ այն փաստաբաների հանրոյթին, որոնք չեն ընկրկում պաշտպանել իրենց վստահորդներին՝ անկախ հասարակական տրամադութիւններից՝ գիտակցելով, որ իսկական իրաւական պետութիւնը կարող է կայանալ այն դէպքում, երբ իւրաքանչիւրն ունի պաշտպանութեան եւ իրաւունքի իրացման բոլոր հնարաւորութիւններն ու երաշխիքները։

• Անցած շաբաթ հիմնադրել եմ հասարակական կազմակերպութիւն։ Մեր նպատակն է լինելու վերահսկել երկում տեղի ունեցող գործընթացները, վերհանել խնդիրները, բայց դրա հետ միասին առաջարկել լուծումները։ Մեր տեսլականն այն է, որ կրթութեան եւ անաչառ, կշռադատուած վերահսկողութեան միջոցով մենք ի զօրու ենք արձանագրել փոփոխութիւններ մեր երկրում։ Մենք պատրաստ ենք մեր թիմում ընդգրկել բոլոր նրանց, ովքեր անտարբեր չեն այն ամէնի նկատմամբ, ինչ կատարւում է եւ պատրաստ են իրենց ջանքները ներդնել իրաւունքի գերակայութեան, մարդու իրաւունքների պաշտպանութեան, ժողովրդավարական ինստիտուտների ամրապնդման գործում։

• «Դաւիթ եւ գործընկերներ» խորհրդատուական ընկերութիւնում իրականացնելու եմ մասնագիտական գործունէութիւն` գործընկերոջ կարգավիճակով: Այս ընկերութիւնը իր տեսակով, թիմով ու գործունէութեան ձեւաչափով եզակի է մեր երկրում: Մասնագիտացած լինելով գործարարութեան, ներդրումների ոլորտներում եւ գործունէութեան առանցք սահմանելով իրաւական ոլորտում համալիր քաղաքականութիւնների մշակումը՝ ընկերութիւնն ընդգրկում է լայն ոլորտներ՝ հարկային բնագաւառից մինչեւ մտաւոր սեփականութիւն։ Մենք կարծում ենք, որ որակեալ ծառայութիւններ մատուցող ընկերութիւնները կարող են ստեղծել իրական արժէքներ, փոխել մեր երկրի գործարար եւ ներդրումային միջավայրը։

• Շարունակելու եմ նաեւ իմ աքթիւ դասախօսական եւ գիտամանկավարժական գործունէութիւնը։ Բացի աւանդական առարկաներից՝ իմ կողմից մշակուել են նաեւ երկու հեղինակային դասախօսութիւնների քուրսեր, որոնք ներկայացնելու համար արդէն իսկ ստացել եմ հրաւէրներ մի շարք բուհերից։

Վերոգրեալը նշանակում է, որ ես շարունակելու եմ իմ աքթիւ ներգրաւուածութիւնը հասարակական-քաղաքական գործընթացներին, խորքային վերլուծութեան եմ ենթարկելու կայացուող որոշումները, իսկ անհրաժեշտութեան դէպքում չեմ խորշելու սուր քննադատութիւն հնչեցնելուց։ Մեր երկրին ծառայելու համար բացի քաղաքականութիւնից եւ պետական ծառայութիւնից, կան այլ կարեւոր հարթակներ, որոնք պահանջում են իրական նուիրուածութիւն եւ փրոֆէսիոնալիզմ։ Յատկապէս կարեւոր է, որ այս փուլում հնչող կարծիքը չդիտարկուի քաղաքական յետագծի կամ կուսակցական պատկանելութեան լոյսի ներքոյ։ Ասուածը յատկապէս կարեւորւում է հասարակական կազմակերպութիւն հիմնելու որոշման համատեքստում, քանզի այսօր օդ ու ջրի պէս անհրաժեշտ է քաղաքացիական հասարակութիւն, որը կը խօսի, ոչ թէ երբ սպասարկում է ինչ-որ շահ, այլ երբ անհրաժեշտ է խօսել` ներկայացնելով հաւասարակշռուած ու համակողմանի կարծիք:

Այս ամէնը հաշուի առնելով` ես որոշել եմ այս փուլում կասեցնել իմ անդամակցութիւնը Հայաստանի Հանրապետական կուսակցութեանը։ Կուսակցական գործընկերներիս յաջողութիւն եմ մաղթում յառաջիկայ շրջափուլերում:

Յ.Գ. Շատ շուտով առաւել մանրամասն կը ներկայացնեմ հասարակական կազմակերպութեան գործունէութեան հիմնական նպատակները, ուղղութիւնները եւ կազմակերպութեան գործունէութեան վերաբերեալ մեր տեսլականը»: