13.09c
Երեվան
հնգ, ապր 18
Գերմանիոյ վարչապետ Անկելա Մերքըլ Հայաստան գտնուած ժամանակ նուէր ստացած է Երեւան բնակող սուրիահայ Ծովակ Գանթարճեան-Օհանեանի գործած սփռոցը: «Արեւելք»ի տեղեկութիւններով Ծովակ Գանթարճեան-Օհանեանը վարչապետին համար ձեռագործ նուէր պատրաստելու առաջարկը ստացած է կառավարութենէն եւ իբրեւ այդպիսին հարմար գտած ութ տարի առաջ սկսած իր ասեղնագործ աշխատանքներէն մէկը, որ Այնթապի հռչակաւոր ասեղնագործութեան դպրոցի կատարեալ նմուշ կը համարուի՝ նորացուած մոթիւներով:
Սփռոցը Անկելա Մերքըլին նուիրուած է առ ի երախտագիտութիւն գերմանական GIZ կազմակերպութեան, որ 2015 թուականէն կը հովանաւորէ Հայաստան բնակող խումբ մը սուրիահայ կանանց՝ ձեռագործ աշխատանքներ պատրաստելու եւ անոնց վաճառքով իրենց ապրուստը հոգալու մէջ: Վարչապետը յուզմունքով ընդունած է նուէրը, իսկ bundeskanzlerin էջը նկար հրապարակած է հայ ժողովրդական վարպետուհիին հետ հանդիպումէն եւ գրառում ըրած ընկերային ցանցին մէջ:
Սուրիահայ Ծովակ Գանթարճեան-Օհանեանը ժողովրդական վարպետի կոչում ստացած է Հայաստանի մէջ: Ան կը տիրապետէ հայկական զարդանախշերու ու հայկական աւանդական կարատեսակներու՝ Վան-Սվազի, Ուրֆայի, Մարաշի, Այնթապի եւ այլ վայրերու ասեղնագործութեան գաղտնիքներուն, ինչպէս նաեւ՝ շղարշ ասեղնագործութեան եւ իր փորձը կը փոխանցէ բազմաթիւ մարդոց:
