ՀՀ վարչապետ Սերժ Սարգսեանը կոչով դիմած է «Ելք» դաշինքի ղեկավար, «Իմ քայլը» նախաձեռնութեան հեղինակ Նիկոլ Փաշինեանին.
«Անցած շաբաթուայ ընթացքում մայրաքաղաք Երեւանում տեղի են ունեցել մի շարք ցոյցեր եւ երթեր: Խաղաղ ցոյցեր եւ երթեր անցկացնելու իրաւունք ունի մեր երկրի իւրաքանչիւր քաղաքացի: Իշխանութիւնները յարգել են այդ իրաւունքը եւ շարունակելու են մշտապէս յարգել:
Ցաւալիօրէն, հանրային այդ հաւաքները յաճախակիօրէն հատել են օրէնքով թոյլատրուածի սահմանները եւ ստացել են անհարկի եւ անարխիկ դրսեւորումներ, որոնց մասին մանրամասն խօսւում է Ոստիկանութեան բազմաթիւ յայտարարութիւնների մէջ: Տեղի ունեցող զարգացումները յղի են անկանխատեսելի հետեւանքներով, վտանգում են հանրային կարգուկանոնը եւ վնասում Հայաստանի հասարակութեան բարդ եւ նուրբ ներդաշնակութիւնը:
Մեզնից իւրաքանչիւրը պարտաւոր է յիշել, որ իրենից բացի այս երկրում ապրում, սովորում, աշխատում եւ հանգստանում են իրենից ոչ պակաս հպարտ Հայաստանի քաղաքացիներ: Մեր հասարակութեան ներդաշնակութիւնը պէտք է հիմնուի համերաշխութեան եւ հանդուրժողականութեան վրայ:
Խորապէս մտահոգուած եմ ծաւալուող ներքաղաքական զարգացումներով: Անդառնալի կորուստներից խուսափելու նպատակով՝ կոչ եմ անում Ազգային ժողովի պատգամաւոր Նիկոլ Փաշինեանին նստել քաղաքական երկխօսութեան եւ բանակցութիւնների սեղանի շուրջ: Դա պէտք է անել անյապաղ:
Վստահ եմ, որ իրավիճակին համարժէք նման երկխօսութիւն ձեւաւորելուն կարող են նպաստել երկրի բոլոր քաղաքական ուժերը»: