image

Ամենայն Հայոց Կաթողիկոսն իր օրհնութիւնը բաշխեց Գէւորգեան հոգեւոր ճեմարանի առաջին լսարանցիներուն

Ամենայն Հայոց Կաթողիկոսն իր օրհնութիւնը բաշխեց  Գէւորգեան հոգեւոր ճեմարանի առաջին լսարանցիներուն

Հոկտեմբերի 11-ին Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Ամենայն Հայոց Կաթողիկոսը հանդիպեց Մայր Աթոռ Սուրբ Էջմիածնի Գեւորգեան հոգեւոր ճեմարանի առաջին լսարանի 18 սաների հետ:

Գեւորգեան հոգեւոր ճեմարանի տեսուչ Հոգեշնորհ Տ. Գարեգին վարդապետ Համբարձումեանը, ներկայացնելով այս տարի հոգեւոր հաստատութիւն մուտք գործած ուսանողներին, նշեց, որ ճեմարանի առաջին լսարանցիների հետ Ամենայն Հայոց Հայրապետի ամենամեայ հանդիպումը գեղեցիկ աւանդոյթ է դարձել: Հայր Գարեգինը նշեց, որ նման հանդիպումները ոգեշնչում են երիտասարդներին եւ առաւել խանդավառում իրենց ուսումնառութեան մէջ:

Այնուհետեւ երիտասարդներին իր հայրական օրհնութիւնը բերեց Ամենայն Հայոց Կաթողիկոսը: Նորին Սրբութիւնը յորդորեց ճեմարանականներին ուսումնառութեան տարիները լաւագոյնս ծառայեցնել գիտելիքներ ամբարելու եւ հոգեւոր առաքելութեան պատրաստուելու համար:

Ամենայն Հայոց Հայրապետն ընդգծեց, որ հոգեւոր սպասաւորութիւնն ազգին, Եկեղեցուն եւ Հայրենիքին անձնուիրաբար ծառայելու լաւագոյն ճանապարհներից է:

Գարեգին Բ. Կաթողիկոսն անդրադարձաւ եկեղեցականի կերպարին` պատգամելով սաներին հետեւել մեր Փրկչի եւ Հայ Եկեղեցու լուսաւոր վարդապետների օրինակին եւ ամենայն նախանձախնդրութեամբ ու նուիրումով իրենց անձերը ծառայեցնել ի փառս Հայոց Եկեղեցու եւ ի մխիութարութիւն բարեպաշտ ժողովրդի: Նորին Սրբութիւնը յաւելեց, որ ժողովրդի յարգանքին ու սիրուն հոգեւորականը կարող է արժանանալ միայն հովուական կեանքում դրսեւորած իր խոնարհութեամբ, նուիրումով եւ անձնազոհութեան ոգով:

Վերջում Ամենայն Հայոց Հայրապետը «Պահպանիչ» աղօթքով օրհնեց ճեմարանականներին` մաղթելով բարեյաջող ուսումնառութիւն հոգեւոր հաստատութեան կամարների ներքոյ:

Հանդիպման առիթով Հայոց Հովուապետն ապագայ եկեղեցականներին ընծայեց Նոր Կտակարաններ: