Սփյուռքի նախարարությունից տեղեկանում ենք, որ նախարար Հրանուշ Հակոբյանի եւ «Միսս Հայաստան» հիմնադրամի նախագահ, «Միսս Հայաստան–1998», «Միսս ԱՊՀ–1999», «Միսիս գլոբ–2009» մրցույթներում հաղթող ճանաչված Գոհար Հարությունյանի միջեւ պայմանավորվածություն է ձեռք բերվել՝ «Գեղեցկության և նրբագեղության» համահայկական մրցույթ կազմակերպել եւ աշխարհի բոլոր երկրներում փնտրել ու գտնել հայ գեղեցկուհիներ, ովքեր Հայաստանը կներկայացնեն «Միսս աշխարհ», «Միսս տիեզերք» մրցույթներում: Նախաձեռնությունը «Միսս Հայաստան» հիմնադրամի նախագահինն է, որ ողջունել է Հրանուշ Հակոբյանը:
Մրցույթի ամփոփիչ փուլը տեղի կունենա սեպտեմբերին, կընտրվեն 25-30 գեղեցկուհի հայուհիներ՝ աշխարհի տարբեր երկրներից և Հայաստանի մարզերից ստացած հայտերի հիման վրա: Մրցույթի մասին հայտարարությունը և հայտերը շուտով կտեղադրվեն «Միսս Հայաստան» հիմնադրամի պաշտոնական կայքում և կուղարկվեն նաև սփյուռքի բոլոր լրատվամիջոցներին, համահայկական կառույցներին ու համայնքներին: