Հրադադարով Հայաստանը, թէեւ բռնի եւ չհամակարգուած կերպով, ազատեց ինքն իրեն երկարաձգուած տարածքային հակամարտութենէն, որ երբեք չէր կրնար յաղթել: Այս մասին գրած է National Interest ամսագրի՝ ազգային անվտանգութեան թեմաներու լուսաբանմամբ զբաղող լրագրող Մարք Էպիսկոպոսը՝ ներկայացնելով յետպատերազմական իրականութիւնը պատերազմող կողմերու համար:
«Այս հակիրճ բնութագրութիւնը կը ներկայացնէ պատմութեան մէկ մասը միայն: Ատրպէյճանական յարձակման ետին կանգնած պայմաններու առաւել ուշադիր դիտարկումը թոյլ կու տայ ենթադրել, որ երկարաժամկէտ հեռանկարի մէջ Պաքուի յաղթանակը կրնայ աւելի թանկ նստիլ, քան Երեւանի պարտութիւնը»,- գրած է հեղինակը՝ շեշտելով, որ Ատրպէյճանի սկսած պատերազմը «ծրագրուած, համակարգուած եւ մեծամասամբ իրականացուած է Թուրքիոյ կողմէ»:
«Հաշուի առնելով, թէ ինչպէս Ալիեւը յաղթեց, յաղթանակը տեղի ունեցաւ Ատրպէյճանի ինքնիշխանութեան գնով», - աւելցուցած է լրագրողը:
Անդրադառնալով Հայաստանի քաղաքականութեան Լեռնային Ղարաբաղի հարցով՝ վերջինս նշած է, որ «հայաստանեան իշխանութիւններու քաղաքականութեան համագումարը Լեռնային Ղարաբաղի հակամարտութիւնը սառած պահելն էր, ինչն ալ, ըստ էութեան, իրականացաւ հրադադարի յայտարարութեամբ»:
«Հրադադարի համաձայնագրով Հայաստանը ազատեցաւ, թէեւ բռնի եւ չհամակարգուած կերպով, երկարաձգուած տարածքային հակամարտութենէն, որուն մէջ երբեք չէր կրնար յաղթել: Պատերազմի թարմ սպիները ժամանակի հետ կը խամրին եւ Երեւանը, Փաշինեանի կամ այլ վարչակազմի իշխանութեան ներքոյ, կը կարողանայ կրկին նուիրուիլ Հայաստան ապրող մօտ 3 մլն բնակչութեան բազմաթիւ ներքին խնդիրներուն: Պաքուն, միւս կողմէն, կը պատրաստուի հսկայական գին վճարել «յաղթանակի» համար, քանի որ յառաջիկայ տարիներուն պիտի կանգնի պետականութեան եւ ինքնիշխանութեան գոյութեան խնդիրներու առաջ»,- եզրափակած է յօդուածագիրը: