image
Հրատապ լուրեր:

Ազգային բարերար Կիրակոս Գույումճեանի հիմնադրած «Ներսէս Շնորհալի» մրցանակը Նաթալի Նաճարեանին

Ազգային բարերար Կիրակոս Գույումճեանի   հիմնադրած «Ներսէս Շնորհալի» մրցանակը Նաթալի Նաճարեանին

Քուէյթահայ բարերար Կիրակոս Գույումճեանի նախաձեռնութեամբ ստեղծուած  «Ներսէս Շնորհալի» մրցանակը շնորհուած է հալէպահայ աշակերտուհի Նաթալի Նաճարեանին։ Այս մասին  «Արեւելք» տեղեկութիւն  ստացաւ Հալէպէն։

Մրցանակի յանձնումը տեղի ունեցած է 14 նոյեմբերին, Հալէպի Հ.Բ.Ը.Միութեան Լ.Ն.-Գ.Կ. Կեդրոնական վարժարանէն ներս, ձեռամբ  Բերիոյ Թեմի  բարեջան առաջնորդ` Տ. Շահան արք. Սարգիսեանին։

 Նաթալի Նաճարեան 2017-2018 տարեշրջանի պաքալօրիայի պետական քննութեան ամենաբարձր նիշ արձանագրած ուսանողուհին եղած է, ոչ միայն իր վարժարանի, այլեւ Հալէպի մէջ գործող հայկական հինգ վարժարաններու մակարդակով,  հաւաքելով ՝  2853  միջին մը (2900-ի  վրայ)։

Նաթալի Նաճարեան իր հերթին շնորհակալական խօսք արտասանած է, նշելով, որ յաջողութիւնը միայն յատուկ մարդոց տրուած չէ, այլ ան բոլորին համար է, որուն կարելի է հասնիլ աշխատանքով, կամքով, համբերութեամբ եւ յոյսով:

Ան նաեւ շնորահակալութեան յատուկ խօսք ուղղած է բարերար Կիրակոս Գույումճեանին, ինչպէս նաեւ Շահան սրբազանին ու իր սիրելի դպրոցին, ուսուցիչներուն, տեսչութեան ու տնօրէնութեան։ 

Յիշեցնենք, որ «Ներսէս Շնորհալի» մրցանակ շնորհելու նախաձեռնութիւնը եղած է քուէյթահայ մտաւորական, բարերար Տիար Կիրակոս Գույումճեանինը, որ արդէն չորս տարիերէ ի վեր Քուէյթի մէջ աւանդոյթ դարձած է, եւ ամէն տարի կը տրամադրուի քուէյթահայ գերազանց հայ ուսանողներու։

Սոյն մրցանակը յետ այսու պիտի ընդգրկէ նաեւ հալէպահայ լաւագոյն աշակերտը։