Այսօր Դամասկոսի հայաբնակ թաղամասերը դարձեալ թիրախ դարձած են ահաբեկչական խմբաւորումներու արձակած հրթիռներուն: Այս մասին տեղեկութիւն ստացանք «Արեւելք»ի Դամասկոսի աղբիւրէն:
Մեր աղբիւրը նաեւ հաղորդեց, որ մասնաւորապէս հրթիռարձակումներու թիրախ դարձած են Ժարամանա եւ Ալ Քասսահ շրջանները , ուր կ'ապրին կան պատկառելի թիւով հայորդիներ: Հրթիռներ ինկած են յատկապէս Ալ Քասսահի Դամասկոսի «Թէքէեան» ակումբին մօտ, ինչպէս նաեւ նոյն շրջանի Ֆրանսական հիւանդանոցին մօտ գտնուող դամասկահայ Տիգրան Աբգարեանի ակնոցի վաճառատան վրայ:
Մեր աղբիւրը նաեւ յայտնեց, որ դէպքերուն կիրակի օր ըլլալուն հետեւանքով շրջանը եղած է ամայի, հետեւաբար զոհեր կամ վիրաւորներ չեն գրանցուած: Խօսքը յատկապէս Աբգարեանի ակնոցի վաճառատան մասին է, որ եղած է փակ:
Կը հաղորդուի նաեւ, որ հրթիռարձակումներուն հետեւանքով հրթիռ մը ինկած է Դամասկոսի Միացեալ վարժարանի կառքին վրայ, ամբողջութեամբ անճանաչելի դարձնելով աշակերտներ փոխադրող մեքենան:
Յիշեցնենք, որ այս հրթիռարձակումները կը կատարուին ահաբեկիչներու տիրապետութեան տակ գտնուող յատկապէս Ղութա շրջանէն, ուր մեծ թիւ կը կազմեն «Ալ Նուսրա» ճակատի զինեալները: