Կաշառակերութեան կասկածանքով ձերբակալուած Ուալիտ Պըն Թալալը բանակցութիւններ կը վարէ իշխանութիւններու հետ՝ պահանջներու բաւարարման համար: Այս մասին կը հաղորդեն Reuters-ի աղբիւրները:
Գործակալութեան տուեալներով, Պըն Թալալ «նուիրատուութիւն» առաջարկած է Սէուտական Արաբիոյ, որու դիմաց անոր դէմ մեղադրանք պիտի չառաջադրուի: Սակայն իշխանութիւնները, մասնաւորապէս երկրի գլխաւոր դատախազը, համաձայն չեն եղած այդ գումարին:
Պըն Թալալը եւ տասը այլ իշխաններ կալանաւորուած, ապա ձերբակալուած էին նոյեմբեր 2017-ին դրամի լուացման եւ լիազօրութիւններու չարաշահման մեղադրանքով:
Պըն Թալալ Սէուտական Արաբիոյ ամենահարուստ մարդոցմէ մէկն է, 14 յունուարի դրութեամբ՝ Bloomberg-ը անոր ունեցուածքը գնահատած է 17.7 միլիառ տոլար: Ան կը գլխաւորէ Kingdom Holding Co-ն, որուն բաժնետոմսերը ձերբակալութենէն ետք արժէզրկուած են, ինչի պատճառով ալ Պըն Թալալի ունեցուածքը կրճատուած է 1,2 միլիառ տոլարով,իսկ մինչ ձերբակալութիւնը Bloomberg-ը գնահատած էր 19 միլիառ տոլար:
Սէուտական Արաբիոյ իշխանութիւնները մտադիր են կաշաառակերութեան մէջ կասկածուող պաշտօնեաներէն եւ թագաւորական ընտանիքի անդամներէ առգրաւել 800 միլիառ տոլար: Ընդհանուր առմամբ, այս արշաւի ծիրէն ներս ձերբակալուած են 60 էմիրներ եւ պետական կառոյցներու ներկայացուցիչներ:
Յիշեցնենք, որ Սէուտական Արաբիոյ գծով յայտնի մասնագէտ Ճոզէֆ Քէշիշեանի «Իշխանութիւնն ու իրաւայաջորդութիւնը արաբական մենապետութիւններուն մէջ» գիրքին մէջ յայտնած է Պըն Թալալի հայկական արմատներ ուենալու մասին:
Անոր համաձայն, Ուալիտ Պըն Թալալ ծնած է 1955-ին, Սէուտական Արաբիոյ մէջ, Էմիր Թալալի եւ լիբանանցի Մոնա ալ Սոլհիի ընտանիքէն ներս: Անոր պապը` Սէուտական Արաբիոյ հիմնադիր եւ երկրի առաջին թագաւոր Ապտուլ Ազիզ Պըն Սաուտ արդէն հասուն տարիքին ամուսնացած է Հայոց ցեղասպանութենէն փրկուած հայ աղջկայ մը հետ՝ Մունաիր անունով:
Մունաիր 12 տարեկանին ներկայացուած է Պըն Սաուտին, իսկ յետագային դարձած է անոր սիրելի կինը եւ 2 որդի պարգեւած է անոր՝ Թալալին եւ Նաուաֆին: